Х. Шихсаэдовлул цIанийсса лачIун буккаврил турнирданий

[dropcap]С[/dropcap]ентябрьданул 28-29-нний Бугленнал шяраву хьунни ДР-лул Халкьуннал Мажлисрал Председатель Хизри Шихсаэдовлул завардансса лачIун буккаврил Щалвагу Аьрасатнал 16-мур тIиртIусса турнир.


ХI. Аьдилов
Муний гьуртту хьунни Да­гъусттаннал шагьрурдаясса ва районнаясса, Ухссавнил Ккав­кказуллал республикарттаясса, Аьрасатнал цаймигу субъектирдаясса лачIунбуккулт. Турнирданий гьуртту хьунни мукунма чIаххувсса билаятирттал – Азирбижаннал, Къазахъисттаннал, Монгъулнал лачIунбуккултгу.

Цинявппагу 200-нния ливчусса спортсментал бувкIун бия цалва бюхъу-хъит ккаккан буван 6 чурххал кIушиврул даражалий: 57,65,74,86,97 ва 125 килордай.
Турнирданийн бувкIминнал хьхьичI махъ лахълай, Хизри Шихсаидовлул бувсунни турнир дуллай бушиву Дагъусттаннайн ххявхсса дунияллул халкьуннал дянивсса террорчитал ххит бу­ккан бувну 20 шин шаврил шинал.

Хизри Шихсаэдовлул барча бунни лачIун буккаврил ва боксрал дунияллул чемпионатирттай ххув хьуми. ЛачIун бу­ккаврил 2-ла дунияллул чемпион Заур Угуевлун буллунни 2 къа­тта бусса квартира, тур ва варси. ЛивчIминнан дуллунни арцуйнусса бахшишру.

КIира кьини най дия лачIун буккаврил турнир. Муний ххув хьуминнан ва хьхьичIунсса кIанттурду бувгьуминнан дуллунни медаллу, кубокру, дипломру ва арцуйнусса бахшишру.
Яла хъунмур зава КИА РИО машина буллунни 57 килорай ххув хьусса Муслим Сяъдуллаевлун.