Дагъусттан цифровой вещаниялийн бувкIссар

[dropcap]О[/dropcap]ктябрь зурул 14-нний уттинин Дагъусттаннай зий диркIсса аналоговый телеканаллу дацIан дурну, зузи дурссар цифровой радиотелевещание.

Республикалий шинал хьхьичIва байбивхьуну бивкIссар цифровой телевещание зузи дансса хIадуршиннарду дузал дуллай.

Мунийн бувну, РТРС-рал пишакартурал Дагъус­ттаннал республикалул шагьрурдай, районнай ва щархъаву бивхьуну буссар телевидение зузи дансса сигналлу дугьайсса 164 станция. СМИ-рдайхчIин ва соцсетирдайхчIин цифровой телевещаниялийн бучIансса хIадуршиннардая агьалинайн шинал хьхьичIва баян буллай буссия.


Имара Саидова
Техникалул пишакартал бувчIин буллай бур, уттизаманнай цинявппа агьали ларайсса даражалул цифровой телевещаниялийн чарабакъа бучIан аьркиншиву. Цифровой телевещания зузи даншиврул, агьалиначIа техникагу дикIан аьркинну дур мунихара лархьхьусса. Яни, телевизордал моделлу хьхьичIарасса духьурчан (2013 шинайн бияннин итабавкьусса) аьркинссар ТВ-приставка ва дециметровая антенна машан ласун. Агана, телевизор бусса къатта-къушлил хьхьичI хъуннасса идара, чIяру зивурду дусса къатри, зунтту, ягу цаймигу хъунисса барурду бухьурчан, антенналуцIун аьркин­ссар усилительгу дикIан. 2013 шиная шихунмай итабавкьусса телевизорду бусса инсантуран аьркиншиву дакъассар ТВ приставкар­тту машан ласлансса.

ХъунмурчIин оьвтIий бур цифровой телевещание зузи дан, ТВ приставка телевизордануцIун дакьин дан кумагру тIалав буллалисса оьр­мулул бугьара хьусса инсантал. Центрданул директор Олег Болдырев цува ялув авцIуну ур инсантурал оьвку­сса зангирдал мурад­ру щаллу хьуну бурив ххал бигьлай.


Шиккува кIицI лаган, Да­гъусттаннал захIматрал министерствалул компенсация буллай бур цифровой телевидениялийн бучIаврийн бувну машан ларсун диркIсса оборудованиялух. Компенсация багьлай бур ахIвал хIал кIюласса чIявусса оьрчIру бусса кулпатирттан ва цивппалу ливчIсса каши да­къасса, кIюласса УСЗН-далул сияхIрайсса агьалинан. Цифровой телевещания зий дайдирхьусса аналограл телевидение зий диркIсса кIанттурдайсса инсантуран булун ккаккан був­сса компенсация бур 1500 къуруш, цифровой вещания зузи дур­сса кIанттурдай ялапар хъанахъиминнан дулун ккаккан дурну дур 6500 къуруш.

Цанчирча, укун­сса кIанттурдай зун най дуну тIий так спутниковый каналлу. Компенсациярду буллантIиссар 2020 шинал апрель зурул 30-ннийн бияннин ЗахIматрал министерствалул биялдарайсса идарар­ттай. Компенсациялухсса арцу ласуншиврул ядан аьркинссар оборудование машан ларсъсса документру. Ялув кIицI лавгсса компенсацияртту буллантIиссар 2019 шинал май зурул 1-нния 2020 шинал апрель зурул 30-ннийн бияннин машан ларсъсса оборудованиялух.

Шиккува бусан, Дагъусттаннал республикалий бур 2% агьалинал уттигу цифровой телевещания зузи къадурсса. ХIурхIацIакул РТРС-рал пишакартал зунтIиссар ми щархъавугу вещания зузи давриха.
Цифровой телевещаниялийн бучIаврил хIакъираву кумаг аьркин багьлагьиминнангу республикалий мукьва зурул хьхьичI зузи дурну дур (горячая линия) ччимур чIумал оьвкуну, цIухху-бусу бувну, кумаг тIалав буллалисса оператортурал штаб. Информациярттал технологиярттал центрданий Республикалул информатизациялул, связьрал ва коммуникациярттал министерствалул сипталийн бувну Информациярттал технологиярттал центрданий тIивтIуну бур оператортурал штаб.

Ва штаб сакин хьуну бур ДР-лул информатизациялул, связьрал ва коммуникациялул, ДР-лул ЗахIматрал ва социал хьхьичIуннайшиврул ва Республикалул жагьилтурал министерствардал пишакартурая.
Центрданий, махъсса гьант­рай бацIаву дакъа кьамул буллай бур агьалинал чулухасса кумагру тIалав буллалисса 1000-ннин дир­сса зангру. Оператортурал цу­ппа ца звонок лях гьан къабивтун, агьалинах вичIи дирхьуну, хьурча телефонналувух бувчIин бувну, къабюхълайни шаппа-шаппайн волонтертал тIайла буклай, цифровой телевещания зузи дуллай, агьали рязий буллай зий буссар.

Цифровой вещаниялийн бучIаврил масъаларттал хIа­къираву цIухху-бусу бан ва кумаг тIалав бан оьвчин бюхъай­ссар региондалийсса оператортурал Центрданийн украсса
­тел. ­8 800 250 74 84.

P.S. Шиккува кIицI буван «Илчилул» корреспондетътал Имара Саидова ва Бадрижамал Аьлиева щаллусса нюжмардул мутталий буссия Информациярттал технологиярттал центрданий агьалинал телефоннал зангру кьамул дуллай. Хъиривми номердайгу вайннал бусанссар цифровой телевещаниялийн бучIаврил хIакъираву цукунсса кумаг аьркин хьуссарив жула халкьуннан.