ДР-лул Роспотребнадзорданул управлениялул баян бунни ЦIуссалакрал райондалий ЦIуссаккуллал шяраву 3 инсан сибирнал язва тIисса азарданул къашавай хьуну ушиву.
Къашавай хьуми уттубишин бувну бур азарханалий. Миннал тагьар мадарану дур.
Азарданул кюру бухлаган баншиврул миккун тIайла бувккун бур ДР-лул Роспотребнадзорданул зузалтрал бригада, профилактикалул ва эпидемиялийн къаршисса давуртту даву мурадрай.
Миннал анавархъиндарай дурсса хъиривлаявурттайну исват бувну бур ми инсантал къашавай шаврил савав диркIшиву тай къатрал залуннал къяча биххаву, биххан хьхьичI ветеринар хIакиннал ххал къабувна. ДикIгу дарххуну диркIун дур чIаххувсса 3 кулпатран ва Каспийскалийсса гъан-маччанан. Анаварну хъирив бивзун управлениялул зузалтрал махъуннай тIалав дурну дур 49 кило дикIул ва ми ччурччуну дур, тикку дезинфекциягу дурну.
Роспотребнадзорданул тIалавшиндарайну медициналул зузалтрал ххал бувссар ми къатравусса ялапартуращал дахIаву диркIсса инсантал, минначIагу дурну дур профилактикалул давуртту. Тиккусса циняв ичIаллил хIайвантран бувну бур сибирнал язвалийн къаршисса вакциналул ххалаххив. Агьалинахьгу буслай бур му азарданул хьхьичIалу кьукьаврил хIакъиравусса давурттая.
Эпидемиологиялул тагьарданул хъирив лаявурттал хIасиллал хIакъиравусса материаллу тIайла дурккун дур ДР-лул Прокуратуралийн ва АьФ-лул ДР-лийсса Силистталул Комитетрайн.
