[dropcap]В[/dropcap]а нюжмардий «Каспий» санаториялий Аьрасатнал Кьиб­лалийсса коммерциялул дакъасса сакиншиннардал форум хьунни.

З. АьбдурахIманова
Форумрал цалчинмур кьини хъамал хьунагу бавкьуну, вайннахь баврув тIисса мурадращалсса хьунабакьавурттугу дурну, октябрьданул 23-нний санаториялул конференц-залдануву хьунни хъуннасса батIаву.

ДР-лул миллатирттал политикалул ва диндалул ишир­ттал министр Энрик Муслимовлул Дагъусттаннал БакIчинал цIания цинявннахьхьун аьла-ссаламгу буллуну, кIицI бувна форумрал хъунмур мурад коммерциялул дакъасса сакиншиннардил дувайсса давурттавух агьалинайнгу хIала-гьуртту хъанан оьвчинсса бушиву.

«Шиная шинайн халкьгу, чантIа тIисса кунма, зу дуллалимуницIун кабакьлай, зу щурущи дуллалисса давурттавух гьуртту хъанай бур. ЧантI увку­сса общество-цумур-цагу билаятрал гужгу, цIакьгур», -кIицI лавгуна ванал.
ДР-лул БакIчинал ва ХIуку­матрал администрациярттал управлениялул хъунама Зубайру Зубайруевлулгу бувсуна, республикалул каялувчиталгу хIадурну бушиву НКО-лул дуллалисса давурттаву цащава шайсса кумаг бан, чIарав бацIан.

[dropcap]Ф[/dropcap]орумрал лагрулий хьунни личIи-личIисса масъалартту гьаз буллалисса мастер-классру, презентацияртту ва дя-дяних хъамаллуран тяхъашиврунсса спорт­рал бяст-ччаллу. Гьурттучитурал хъуннасса къулагъас дурунни шикку «КриоРус» фирмалул вакил Данила Медведевлул «Аьрасатнал Кьибла-2030. Жула бучIантIимур-жула карунниву» тIисса проектрах.
Форум нанисса гьантрай хъамал бувцуссар жула тарихрал кIанттурдайнгу — Дарбантлия тIайла хьуну, Сулакьрал къуманивун бияннин.