Бугьараминнал кьини Ваччиял культуралул къатраву

Оьмариева Аьишат оьрчIащал балай щаллу буллай

[dropcap]О[/dropcap]ктябрь зурул 2-нний, Ваччиял шяраваллил культуралул къат­раву хьунни бугьараминнал зурул лагрулийсса, Ваччиял шяраваллил бугьарами барча буллалисса мажлис-тяхъашиву.

Шивун шяраваллил бугьарами барча бан бувкIун бия мукунма Ваччиял школалул лавайми классирттал дуклаки оьрчIру цала учительница Мяъсудова Марзиятлущал.


Тяхъашиврул мажлис тIивтIу­на Ваччиял культуралул къатлул хъунмур Оьмариева Аьишатлул. Авадансса ссупралух щябивкIун бунува шяраваллил бугьарами барча бувуна балайрдайну, дикломацияртту дуккаврийну школалул оьрчIал.

Барча бавуртту дуруна мукунна Ваччиял шяраваллил бакIчи МахIаммадов Арсеннул,Ккуллал райондалул ветерантурал советрал председатель Загьидиев Аьбдуллул, Оьмариев Жамалуттиннул ва цайминнал. Ххуйсса балай увкуна школалул оьрчIал. Мажлисрайн бавтIмий барча бан балайрду увкуна райондалул культуралул къатлул зузала Кьурбанов ХIабибуллагьлул, Ваччиял культуралул къатлул худрук Суллуев Муслимлул, райондалул музейрал зузала, суратру дихьу Кьурбанов Сиражуттиннул ва цайминнал.

Бугьараминнал цIания ва укунсса тяхъашиву хIасул дур­сса культуралул зузалтрахь, шяраваллил администрациялухь барчаллагь увкуна Загьидиева ПатIиматлул.