КутIанугу, чумартну бувтсса оьрму

Хушлаев Рамазан увну ур ЧIяйннал шяраву 1924-ку шинал Хушлал ва Аьйшатлул къушлий. Рамазан школалийн лавгун ур 7 шинаву.

 1941-ку шинал ванал марцIсса ххювардай къуртал бувну бур 10 класс. Ванащал дуклай бивкIсса 29-ннава 5-ннал мусил медаллу ларсун дур: Хушлаев Рамазаннул, Халибеков КьурбанмахIаммадлул, Султанов ХIасан-ХIусайннул, Мусаев Исял, Адамов ХIажинал.


[dropcap]Б[/dropcap]уттал кIанттул цIанийсса Хъунмасса дяъви байбивхьу­сса шинал 17 шинавусса Рамазан хушрай, 18 шингу хьун дурну, аьрайн лавгун ур. Ванащала лавгун ур Султанов ХIасан-ХIусайнгу.

Рамазан талай ивкIссар Закавказский фронтрай.1943-ку шинал ахирданий, немецнал танкарду ялун дирну, окопирттаву­сса жула солдатнай къия хьуну диркIун дур. «Взводрал командир акъар», — тIий, окопирттаву ххал уллай, лявкъуну ур контузиялул хьуну Рамазан. Яла Бакуйн иян увну ур госпитальданийн, Бакуягу – МахIачкъалалив.

Рамазаннул бугьара хьу­сса нину-ппу му ивкIусса ххайри бивкIсса. 1945-ку шинайнин Рамазан хъин хъанай ивкIун ур. Дяъви къуртал шайхту увкIссар шавайн. Муния махъ Дагъус­ттаннал шяраваллил хозяйствалул институтравун дуклан увх­ссар, ветеринар шайсса факультетрайн. Ххюрагу шинай институтраву Сталиннул цIанийсса стипендия ласайсса ца Рамазанни ивкIсса.

Га чIумал целиналийн гьан бай­сса чIуннугу диркIссар. Къазахъисттаннайн Рамазангу гьан увссар целиналийн. Ванащал бивкIссар ЧIятусса МахIаммадов Ибрагьин-Халил ва СултанахIмадов Ашрин. Рамазаннун целиналия премиялун лачIал машина бувкIссар Буйнакскалийн.
Институт къуртал байхту, Рамазан зун тIайла увкссар Къизлардайн. Кулпат Асиятгу бувцуссар цачIанма. Зий ивкIссар Къизлардал райондалул хъунама ветеринар хIакинну.
Рамазан ия хъинну инсантуран бусравсса, хIал бавкьу­сса. Ванал буссия 5 оьрчI. Амма ми щаллу бансса мутта къабуллуну, оьрмулул 48 шинаву аьпалухьхьун лавгссар. Ганал хъирив кIия оьрчIгу лавгуна. Аллагьнал чивчумунила бу­ккан къашайхха. Алжан булуннав ливтIуминнан, махъминнахьхьунгу цIуллушиву дулуннав.

Басират Мамедова,
ш. ЧIяйми