[dropcap]О[/dropcap]ктябрьданул 21-нний региондалул ХIукуматрай хьунни паччахIлугърал кадастрданул кьимат бищаврил хIакъираву Хасавюртуллал,
Лаващиял ва Сергокъалаллал районнал бакIчитуращалсса батIаву.
[dropcap]Б[/dropcap]акIрайва Дагъусттаннал вице-премьер Екатерина Толстиковал бувсунни ва нюжмардий укунсса батIавуртту хьунтIий душиву циняв муниципал сакиншиннардал бакIчитуращал. Мунил тIимунийну, ми батIавуртту дуллалиссар, кадастрданул кьиматрал хIакъиравусса отчетрал (промежуточный отчет) хIакъираву цалва рязи бакъашивурттая бувсун, отчет тIайла дацIан дан бюхъаншиврул.
Отчетрал хIакъиравусса ихтилат бунни Сергокъалаллал райондалул бакIчинал хъиривчу Оьбайдат ХIусмановал. Мунил гьартану бувсунни, слайдругу ккаккан дуллай, объектирдал дуциннал ва багьрал хIакъираву. Цаппара кIанттурдай объектирдал багьри тIайла бацIлай бакъая «Дагтехкадастрданул» ккаккиярттащал. Екатерина Толстиковал пикрилий, хъунмур гъалатI ми иширттаву хъанахъиссар объект хIисавравун ласайни къатIайлану ккаккан дурну диркIшиву объект бувсса чIун ва га бувсса материал. Мива гъалатIирттая ва ми хIисавравун ласаван аьркиншиврия ихтилат бунни мукунма ДР-лул аьрщарал хъус-хъиншивурттал арардал министр АгъарахIим КьагьирхIажиевлул. Муналгу бувсунни жяматрал пикри-зикрирду хIисавравун ласун аьркиншиву. Министрнал тапшур бунни, хасъсса комиссиялущал архIал квартирарттавун ва къатравун лавгун, объектру тIайлану учетрайн ласун.
Масъалалул хIакъираву ихтилат бунни Сергокъалаллал райондалул бакIчи МахIаммад Оьмаровлулгу.
Кадастрданул кьимат бищаврил отчетирттал батIавурттай гьуртту хьун тIий бур Дагъусттаннал парламентрал депутатъталгу.
