ЦIусса хаварду ца-кIива ххуттайну

Космосравугума чак личIантIий бакъар

Сентябрь зурул 25-нний «Союз-ФГ» ракеталий космосравун гьаз хьунтIисса

Аьра­бусттаннал космонавт (ва тайннал билаятрал тарихраву цалчинсса космонавтри) Хаза Аль-Мансурил пресс- конференциялий баян бунни чара бакъа ххювагу чакгу буллантIишиву космосраву. «Зун ккаккантIиссар Аьрщарайн тIайлану на чак буллалисса куц, на видеосурат ласун дакIний ура», — увкунни ванал. Бувсунни космосравун ласунтIишиву цащалвами хъамалу буван миллатрал шанна дукиягу.

ЦIарава душ ххассал бувсса виричу

Соцсетирдай хъинну машгьурну дур Нижневартовс­калий цIараща душ хха­ссал був­сса дагъусттанчу Аьли Оьма­ровлуятусса видео. Ххюлчинмур зивулийсса квартиралуву цIу лачIайхту, душ бур къазразанну чIавахьулттил чIамуй бавцIуну. Аьлил, анаварну ряххилчинмур зивулийсса чIаххувраннийхчин чIавахьулттичIан увккун, луватусса чIавахьулттил чIамуй бавцIусса душ кIункIу бувну, гьаз бувну, ххассал буллай ур. Виричунан 29 шин дур, цувагу 4 оьрчIал ппу ур.

Къутри дуллалисса робот

Boston Dynamics компаниялул инженертурал къутри дуллалисса ва тIанкIа тIутIисса робот хIа­сул дурну дур. Ва техникалуву ва элмулуву хъунна­сса хьхьичIуннайшивур тIий бур экспертътал, инженертуран даврин лавайсса кьимат бишлай.

Къиримнал ламул цIасса чахир

Шинал ахирданийнин бувну къуртал буван аьркин­сса Къиримнал ламул цIасса чахир дуккан дурну дур Къиримнал ва Таманнал чяхирдувултрал цачIу. Ми чахиргу дахлантIий бур Керчен проливрайхсса ламуйх поездру занан бикIайхту. ХIакьинусса кьини ламу цинярда рельсру дирхьуну хIадур бувну бусса бур. 2024 шиналнин ва ламучIан Краснодардаягу ххуллу буван дакIний бу­сса бур.

ХIадур бувссар
П. Рамазановал