ЦIуллу-сагъшивруцIунсса маслихIатру

Ахъулсса ва ахънилссагу даруври

НякIунна
НякIуннаравусса антоциан тIисса затрал яруннил оьттул мюршсса туннурдал тагьар ххуй дайссар,яру чаннал дахханашивурттайн вардиш шайссар, нерварду аьркинссаксса кислородрал ва дукиялул щаллу дайссар. Гьассар нюжмардий кIийлла 100 гр. някIулнна ялул дукарча.

Гьивч
Мудан гьивч канакисса инсаннай атеросклероз къашай­ссар, ххюттуй дурухлу хьунссар тIисса нигьачIишиву чан шай­ссар. Гьивчувусса кверцетиндалул нярал клеткарду тархъансса радикаллая буруччайссар, Альц­геймердул цIуцIаву диян къадитайссар. Канакияра гьантлун 2 гьивч.

Къур
Къурувусса лютеиндалул ва фальцариналданул клеткарду зия хьун (лиян) къабитайссар, мунийну урувччуну итайссар инсан дурухлурдая. Дуркуну хъинссар къур гьантлун 100 гр. ягу 150 мл. цIуну дурсса сокрал.

ЧIикIунтIа
Ва ахънилссаннуву лахъссар азотрал цачIуншивуртту. Агарда азот жулла организмалуву цила бикIан аьркинссаксса бухьурча, туннурду гьарта був­ккун, давление яларай дагьай­ссар. Давление лахъсса инсаннан чIикIунтIа хъинссар. Ягу гьан­тлун 1-2 стакан чIикIунтIалул щинал хIачIларча хъинссар.

Нисварти
Нисвартул ххуйну мякь ли­ххан байссар, калориярттугу бувагу бакъассар муниву. Нисвартул кумаграйну ххишаласса кислотIа ду­ккайссар, мукунна жулла организмалува буккан байссар цIугу, мунийну ччаруллал даву ххуй шайссар.

Чимус
ЦIусса чимусуву чIявуссар флавоноидру ва чIаматIу (сера). Вайннул кумаграйну оьттувусса качар чан шайсса бур. Му ба­къассагу, оьттуву холестерин чан байсса бур. Щюлли чимусгу, чимусул бакIгу гужсса антиоксидантрури. Гьарца чIумал бичлачияра чимус салатирттайн ва личIи-личIисса дукрардайн.

ЦIуллуну битаннав!
Т. ХIажиева

Читайте также: