ТIивтIунни жагьилтурал форум

[dropcap]С[/dropcap]ентябрьданул 25-нний ДР-лул БакIчи Владимир Васильев увкIунни «Каспий – 2019» тIисса Дунияллул халкьуннал дянивсса жагьилтурал форумрайн.

[dropcap]Ф[/dropcap]орум хьун тIий бур сентябрьданул 24-28-нний Къарабудахккантуллал райондалий. Гьашину му форумрай гьуртту хьуну бур АьФ-лул 34 субъектраясса ва 17 билаятраясса 700-нния ливчусса инсантал. Ми дукIунияр кIилий чIявуссар.

[dropcap]Ф[/dropcap]орумрал программалул темарду дур: жагьилтурал бакIчитал, жагьилсса ишбажаранчитал, жагьилтурал медиа.
Республикалул каялувчинал ххал бунни форумрал патриотшиврун хас бувсса площадкартту.
Форум тIитIлай, Владимир Васильевлул аьла-ссалам бунни миккун бавтIсса жагьилтурахь. Мунал тIимунийну, Да­гъусттаннай гьашину 7-чинни буллали­сса ва форум.

2017 шинал муний гьуртту хьуну ур 200 инсан, гьашину – 700-нная ливчу­сса. Республикалул каялувчинал бувсунни жагьилтурал паччахIлугърал политикалул бугьлагьисса кIанттуя: «Хъунмур никирал инсангу ухьувкун, ттун бувчIлай бур, зу хIала-гьурттуну бакъахьурча, ялун бучIантIимунил мяъна дакъашиву», — увкунни мунал.

[dropcap]Ф[/dropcap]орум тIитIаврий гьуртту хьунни ДР-лул БакIчинал ва ХIукуматрал Администрациялул каялувчи Владимир Иванов, ДР-лул ХIукуматрал Председательнал хъиривчу – дуккаврил ва элмулул министр Уммупазил Оьмарова, ДР-лул жагьилтурал иширттал министр Камил Саэдов ва цаймигу.

ХIадур бувссар
ХI. Аьдиловлул