Шяраваллал къушру ххал бувну махъ дайдирхьуна агьамми шадлугъру. Юсуп МахIаммадовлул бувсуна Лакрал райондалул тарихрая, республикалул ва билаятрал
тарихраву райондалул агьалинал дурсса гьурттушиндарая, райондалул ва щала Дагъусттаннал цIа бюхттул дурсса инсантурая, цува каялувчину зузисса 12 шинал мутталий райондалул оьрмулуву хьусса хьхьичIуннайшивурттая.
Муния махъ Артем Здуновлул, райондалул агьали барча буллай, кIицI лавгуна дахIалай чинсса бушиву Лакрал райондалул тарих, аьдатру, цIанихсса арсру – республикалул мусил фондраву цIарду чирчусса чичулт, аьлимтал, хIакинтал, захIматкаш. — Бусалардавун багьсса ПартIу ПатIимая, Надир-шагьнал аьрал ххит бавриву агьамсса кIану бувгьусса Сурхай-ханная ва Хан-Муртазааьлия байбивхьуну, Хъунмасса Буттал КIанттул цIанийсса дяъвилий ва къинттуллух талай бивкIсса чиваркIуннайн бияннин лакрал миллатрал гьарцагу ник хьуну дур ватандалун пахрулунсса.
ХIакьину на ххарину ура зу буттахъал ххуллийх най бушиврия, район хьхьичIуннай хъит тIий душиврия. Асар хъанай бур тарихрахсса ва магьирлугърал гьайкаллахсса зул хIурмат, буттал аьрщарахсса ччаву.
-ХIакьинусса кьини Лакрал райондалул аьрщарай яхьуну дур 114 архитектуралул ва магьирлугърал гьайкал. Миннува хьхьичIунсса ххуттайн ласун лайкьсса дур мяйлчинмур ттуршукулий бувсса цIа ларгсса Гъумучиял Хъун-Мизит, Гъумукун бухлахисса ххуллий жува хьунабакьлакьисса Хан-Муртазааьлил ва ПартIу ПатIимал гьайкаллу.
Жун чIалай бур райондалул потенциал. ЦачIу жува ттигу чIявусса мурадру чулийн буккан бантIиссар. ТIутIайх бичиннав Лакку билаят! – кунни цала мукъуву Артем Здуновлул.