Инвестициярттал политикалуха лябукку буну зун

[dropcap]С[/dropcap]ентябрьданул 16-нний ДР-лул ХIукуматрал Председательнал цалчинма хъиривчу ХIажимахIаммад ХIусайнов гьуртту хьунни Аьрасатнал Минэкономразвитиялул видеоселекторданувух хьусса батIаврий.


Ххал бигьлай бия инвестициярттал иширттал хIакъиравусса масъалартту.
Аьрасатнал экономикалул министр Максим Орешкиннул тIимунийну, Владимир Путиннул цIакь дурну дур регионал каялувчинал давурттал мюнпатшиврун кьимат бищаврил 15 ккаккия (критерий), миннувасса ца дур инвестицияртту дучIан даврилмур.

«Региондалул даражалий хъуннасса даву дан багьну бур, жу муницIун кабакьланну. Мурадлувсса ккаккиярттайн букканшиврул гьарца субъектрай аьркинссар хIадур дуван инвестициярттал давуртту лядуккан даврил план», — увкунни Максим Орешкиннул.

БатIаврий бусаврийну, агьаммур капиталданувунсса инвестицияртту гьарзану дучIан даву мурадрай дуллай бур укунсса давуртту: Дагъусттаннай инвестициярттал проектру дузрайн дуккан дулланшиврул дузал дуллай бур инженер инфраструктура; хIадургу дурну, дузрайнгу дуккан дуллай бур республикалул адресрайсса инвестициярттал программа; бартдигьлай бур 41 паччахIлугърал программа, миннувух дур экономикалувун инвестицияртту дучIан даврицIун кабакьу буллалисса давурттугу.

Дагъусттан гьуртту хъанай бур 22 федерал программалувух. Каспийскалий ва Дагестанские Огнилий, сакингу бувну, зий бур 2 ТОР (территории опережающего развития). ТОСЭР-данул резидентътуран зузи дурну дур налогру дишаврил хIаллихшинну дусса низам, дузал буллай бур 6 индустриал парк. Дуллай бур ишбажаранчитал чаннайн буккан баврил даву.
БатIаврий гьуртту хьуминнал бувсунни му ххуллий дуллалисса цаймигу давурттая.
Масъала ххал бигьаврил хIасиллу дуллай, 1-ма вице-премьернал цаппара идарарттал каялувчитурайн дунни аьркинсса тапшурлугъру.

ХIадур бувссар
ХI. Аьдиловлул