ЦIусса дуккаврил шинаву щала Аьрасатнаву шяраваллал школарттай зун дайдихьлай дур цIусса федерал программа – «Ттизаманнул школа» тIисса», цувгу щурунтIий дур «Лябуккулул аьш» тIисса биялалий.
[dropcap]М[/dropcap]у центргу щурущи дантIий бур шяраваллал ва мюрщисса шагьрурдал школарттай. Хъунмур къулагъас дикIантIий дур «Технология», «Математика ва информатика», «Физикалул культура ва оьрмулул иширттал мюхчаншиврул гьанурду» тIисса дарсирдах.
Шанттуршазарда къурушрансса ремонт школалул ягу кIанттул администрациялул цала бакIрайн ласурча, федерал бюджетрава итадакьлай бур ца миллион ва ряхттуршазарда къуруш, школалий кIива кабинет му центр тIитIинсса куццирайнгу бувцуну, аьркинсса оборудованиялул лащу-щаллу баншиврул.
Центрданий тIитIлай бусса бур ххисса штатругу. Лакрал райондалул администрациялул кашилуцIух шантту-шанттурш азарда къуруш итадаркьуну, ва программалувун багьну, тIалавшиндарацIун даркьусса ремонтгу дурну дур Гъумучиял ва КIундиннал школарттай.
Мунил ялув ихтилат хьунни КIундиннал школалул директор Гуйдалаев Абакар ХIамзатлул арснащал.
— Цими оьрчI най ур цIусса дуккаврил шинал зул школалийн?
— Ларгсса дуккаврил шинал жул школалий дуклай уссия 48 оьрчI. Миннава 4-ннал школа къуртал бувунни. УрчIва класс къуртал бувсса 6-ннавату 4 увххунни дуклан. ЕГЭ къадулланшиврул, 9 класс къуртал бувну, дуклан нанимигу шиная-шинайн чIяву хъанай бур. ЦIусса дуккаврил шинаву 1-мур классравун учIантIий ур 3 оьрчI. ЧIарттал шярава учIайсса ур шама, шамагу – 11-мур классравун. Зий ур 15 учитель. Гьарца дарсирдал учительтал биялну бур. ЧIявуминнал бур лаваймур категория.
— Цукунсса хьур ЕГЭ-лул хIасиллу?
— ЕГЭ дуллалисса мукьуннава ца ливчIунни къадуллуну.
МахIаммадова Шуаьнатлул цийнува цила оьрус мазрал ЕГЭ-лул лавсунни 96 балл.
— Цинявппа кабинетру хIадурссарив цIусса дуккаврил шиналнин? Ремонт щил каширдацIух дарду?
— Арцу итадаркьунни райондалул администрациялул. Ремонт дан барду Агьали давурттал дузал байсса центрданий сияхIрайсса шиччавасса оьрчIал, чIумуйнусса духьурчагу, миннан даву хьуннав тIий.
— КIундиннал школа бур райондалий конкурсирттай, олимпиадарттай, спортрал бяст-ччаллай чялишсса гьурттушинна дувайсса, ца ххуттал бухьурчагу, хьхьичIунсса школа. Цукун кьамул дунни педагогтурал школалий хъанахъисса цIушинна?
— Ххарину кьамул дунни. Цанчирча «Лябуккулул аьш» («Точка роста») тIисса» центр тIитIаврийну школалий зунсса 6 кIану ххи хьунтIий бур. Гъирарай лавгунни дистанцион пишакаршиву ларай дансса курсру буккингу.
Зузи дуллантIиссар ххисса личIи-личIисса программартту: цифрардал, техникалул ва гуманитар профиллал. Сакин дуллантIиссар дарсирал кьатIувсса давуртту, ххал дигьлантIиссар каникуллал чIумал школарттачIа зунсса лагерьдал программартту. Проектрал давриха зузи буллантIиссар дуклаки оьрчIру ва учительтал.
— Барчаллагь, Абакар. ТIайлабацIусса дуккаврил шин хьуннав!
Ихтилат бувссар
Зулайхат Тахакьаевал
