ЦIуллу-сагъшиву дуруччаврил министр – Лаккуй

Зузи бантIиссар цIусса азархана

Лакрал район сакин хьуну 90 шинал юбилейрал шадлугърайн увкIсса Дагъусттан Республикалул цIуллу-сагъшиву дуруччаврил министр Жамалуттин ХIажиибрагьимовДагъусттаннал Медуниверситетрал ректор Сулайман Маммаевлущал ялтту увккунни Гъумучиял азарханалий уттубивхьусса къашайшалтрал. Ххал дунни азарханалийсса шартIру, жап увкунни къашайшалтращал.


Гьашину райондалул азарханалийн дуркIун дур цифрардал маммограф, хIадур увну ур муний зунсса пишакар онколог-маммологгу.
Министрнал цIухху-бусу бунни ацIния ххюра шинал хьхьичI дуллай дайдирхьуну лахъи ларгсса азарханалул къатрал ялув.

[dropcap]М[/dropcap]иккун итадакьлакьисса арцу кьуркьуну, чIярусса шинну хьуссия даву дарцIуну. Дахьра гьашину цIу дуккан дуллай байбивхьунни давуртту. Азарханалул хъунама хIакин АьвдурахIин Дибировлул бувсунни къатраву даххана дан багьлай бушиву планировка, къатри дарцIуну ду­ссаксса шиннардил мутталий проект цурдагу дух хьуну, нузру ва чIавахьулттугу баххана бан багьлай бушиву хIисаврайн лавсун.
ЦIусса азархана тIитIин кка­ккан бувну бур 2020 шинал, мунил гьанулий тIитIин дакIний бур гериатриялул отделениягу.

Лакрал райондалиясса
репортаж хIадур дурссар
Зулайхат Тахакьаевал