[dropcap]С[/dropcap]ентябрьданул 5-нний «Дагестанская правда» кказитрал редакциялий хьунни Ростовуллал улклуйсса Аьрасатнал ГУ ФСИН-далул хъунама, кьура шинал хьхьичI ЦIуссалакрал РОВД-лул хъунаману ивкIсса, виваллил къу­л­лугърал генерал-майор Даххаев Муслим МахIаммадлул арснащалсса пресс-конференция.

Муслим Даххаев 1983 шиная тIайла хьуну зий ивкIссар виваллил ишир­ттал органнал личIи-личIисса къуллугъирттай. 1995 шинал къуртал бувссар Аьрасатнал МВД-лул юридий институт. Мунан дуллуссар «ДР-лул лайкь хьусса юрист» тIисса цIа, «За вклад в развитие уголовно-исполнительной системы Ро­ссии» тIисса мусил медаль ва Чувшиврул Орден.

ХI. Аьдилов
Муслим Даххаевлул республикалул журналистурахь бувсунни, 1999 шинал азарахъул боевиктал, дунияллул халкьуннал дянивсса террористал Хаттаб ва Басаев бакIчиталну Чачаннал Республикалия Дагъусттаннайн ххявхсса чIумал, ЦIуссалакрал РОВД-лул хъунама, та чIумалсса майор Даххаев цала милицалт­ращал талай бивкIсса иширттая. Мунал тIимунийну, тай гьантрай ЦIуссалакрал шяравалу террористуран ласун къашай­сса къалану диркIун дур. Аьрасатнал аьра­лийтал биянцIа кIанттул милицанал зузалт кумаграя умуд кьувкьуну талай бивкIун бур. Гьаман микку бацIан бувну бивкIун бур бандитътал, республикалул вив буххан къабивтун.
Жу ми иширттал хIакъираву гьартану чивчуссар «Илчилул» ванияр хьхьичIмур номерданий. Мунийн бувну, Муслимлул бувсъсса гьарзат шикку уттигу цал тик­рал къабуванну. Амма та чIумалсса ца иширал хIакъираву кIицI банну.

Федерал СМИ-лул анавар бувккун, баян бувну бивкIссар, ЦIуссалакрал милицалт ва Липецкаллал ОМОН-далул зузалт талатавриву бухлаган бувну бур тIий. Штабирттай анаварну хIадур бувну бивкIссар ЦIуссалакрал РОВД-лул хъунама майор Муслим Даххаевлун Аьра­сатнал Виричунал цIа дулунсса документру.

МахIачкъалаливгу, Москавливгу му ивкIуссар тIий бивкIссар. Амма майор Даххаев сагъну личIаврияр ххишала, мунал лагма ругьаврива буккан був­ссар РОВД-лул сайки 80 зузала ва хха­ссал ув­ссар Липецкаллал ОМОН-далул 24 талатала. Ва ялагу, майор Даххаевлуща бювхъуссар лагма ругьаврива ххассал дуван Чачаннал дазуй диркIсса виваллил аьралуннал взвод. Ми гьунардахлу ва дунияллул халкьуннал террористуращалсса талатавриву ккаккан дурсса чувшиврухлу Муслим Даххаевлун дуллуссар анжагъ Чувшиврул орден.

Махъсса шиннардий М. М. Даххаев зий ивкIссар ДР-лул виваллил иширттал министрнал хъиривчуну, мунал каялувшиврий бивкIссар терроризмалущалсса масъалартту.
«Илчи» кказитрал редакциялул икьрал дурссар вай гьантрай Муслим Даххаевлущал хьунабакьин.