Яттил нис кьюкьинтIиссарив?

[dropcap]Я[/dropcap]ттил нис дуллан най бур ляличIисса «ассип» тIисса яттил накIлия Дагъусттаннал аграрий университетрал студентътурал. Мунил хIакъираву пресс-конференциялий бувсунни му проектрал ца сиптачи Руслан ХIамзатовлул.

ХI. Аьдилов
Мунал тIимунийну, махъсса ппурттуву Дагъусттаннай ­яттил нис лап чансса дакъа дуллай бакъар. Мунил савав хъанай дур нис дуккан дайни лавай­сса даражалул аьркин-къарцин ишла къадуллалаву. Мунийн бувну муналгу, мунал кIия дус ХIусайн Къараевлул ва Шамил МахIаммадовлулгу хIукму хьуну бур цIана зузисса хозяйствалуву ассип журалул ятту ябуллай, миннул накIлия нис дуллан. Му журалул яттил тамансса накI дулайсса дур, чIиругу ттихъин бувну, нис данссагу личIайсса дур.

ЦIубутIуй ми жагьилтурал цалва пикри-зикри бувсун бивкIссар «Айихьлахьисса фермер» тIисса республикалул фермертурал батIаврий, му комиссиялул миннан буллуну бур хьхьичIунсса кIану. Яла миннал цалва сипталия бувсун бур Воронежрай хьусса фермертурал ятIапрай, тиккугу миннан бивщуну бур лавайсса кьимат. ЦIанасса ппурттуву студентътал хIадур хъанай бур ДР-лул Минсельхозраясса грантирттал конкурсрайн. Проектрал автортурал пикри бур субсидияртту лавсун, зий байбишин.

Ми зун ччай бур Къизилюртуллал райондалий, тикку племсервисрал базалий миннал ижаралий бугьан тIий бур къатта. ЯлунчIил февральданий миннал ласунтIий бур ятту ва байбишинтIий бур, гъинттул дуллан нис.
Нис дахлансса пикри бур цIу бутIуй республикалий, миннал машварартту бувну бур рестораннащал. Яла студентътурал пикри бур нис дахлан Аьрасатнал цаймигу регионнай, мукунна дазул кьатIувгу. Кьюкьинавав яттил нис жучIара?