Август зурул 17-18-нний Франциянаву, Монтуар шагьрулий, хьунни Дагъусттаннал халкьуннал творчествалул кьинирду къуртал дуллалисса мероприятияртту.

П. Рамазанова
Проектрай гьурттушинна дурссар Хасавюрт шагьрулул «Эхо гор» тIисса хореографиялул ансамбльданул, унцIукIуллал усттар МахIаммадаьли МахIам­мадаьлиевлул ва къайтагъуллал гулавати щащу Зубайдат ХIасановал.

Дагъусттаннал ансамбльданул чIярусса концертру ккаккан дурссар Аржентон, Фелетен, Монтуар шагьрурдай, мукунма хьуссар дагъусттаннал канил давурттал усттартурал мастер-классру. «Эхо гор» ансамбльданун лахъсса кьимат бивщунни франциянал тамашачитурал. Фестивальданул гьану бивзсса Жан Франсуа Пру мукIру хьунни дагъусттаннал коллективрал номерду яла яргми бивкIшиву. «Фестивальданул 47 шинал тарихрал лажиндарай дагъус­ттанналмур коллектив хьуну­ккар яла хьхьичIунмур, вайннал хореографиялул, артистизмрал, балайчитурал чIурдал хIайран унна», — тIий ур ва.

Авгъуст зурул 17-нний фестивальданул агьаммур майданнив ккаккан дурсса концертрай гьурттушинна дурну дур шанма коллективрал: Ливаннал, Парагвайнал ва Дагъус­ттаннал. Ва концертрай тамаша буван бувкIун бур Франциянаву яхъанахъисса дагъусттанлувталгу. Вайгу артистуращал лезгинкалий къавтIун бивзун бур. Франциянал агьлугу хIала бувххун бур къавтIавривух. Хъирив кьини тIурча, Монтуарнал мэриялуву коллектив хьунабавкьуну бур шагьрулул мэрнащал ва фестивальданул президентнащал. Вайннан дуллуну дур дакIний личIансса бахшишру.