Августрал 13-нний Дагъусттаннал ХIукуматрал Председатель Артем Здуновлул циняв министртуращал цачIу ххал диргьунни ДР-лул БакIчинал Халкьуннал Мажлисрайнсса Рисала
дузрайн дуккан даврил давурттал хIалкьазия. БатIаврий гьуртту хьуминнал ххал дунни республикалул хIукуматрал хIадур дурсса план, ххал диргьунни му пландалий ккаккан дурсса давуртту цукун бартдигьлай буссарив, ккаккан бунни захIматми кIанттурду ва ми чулийн буккан бансса ххуллурду.
Артем Здуновлул тIимунийну, цIанасса ппурттуву агьаммур ишну хъанахъиссар республикалул каялувчинал тапшурлугъру бартдигьаву, хIарачат буван аьркинссар хьхьичI бивхьусса масъалартту цила чIумал дузрайн буккан буван.
ДР-лул Минэкономразвитиялул министерствалул ккаккиярттайн бувну, хIакьинусса кьини цаппара социал объектру ва инженер инфраструктуралул объектру бавриву агланшивуртту хъанай дур. Амма ми давурттал жаваблувсса каялувчитурал бакIрайн лавсуну бур шинал ахирданийннин давуртту бакIуйн дуккан дуван тIий бушиву.
Артем Здуновлул бувсунни мукунма, газрал ва электросетирдал хозяйство цила низамрайн дуцаврил давурттугу дайдирхьуну душиву.
Ххал бивгьунни мукунма гьашину учительтуран, садик-яслирдал зузалтран ва цаймигу журардал зузалтран харжру лахъ баврил масъала. Вице-премьер ХIажимахIаммад ХIусайновлул тIимунийну, бюджетрал аралул зузалтрал харжру лахъ бувну бур. ЦIана лахъ буллай бур садик-яслирдал зузалтрал харжру. Ихтилат хьунни мукунма оьрчIансса напакьа лахъ бавриягу (гьар зурухсса). Му закондалул проект хIадургу дурну, финансирттал министерствалийн тIайла дурккун дур.
Ххал бивгьунни инвалидтал къатрал дузал баврил ва давурттал щаллу баврил масъалагу, медициналул идарарттан ва школарттан машинартту ласаврил масъалагу. Артем Здуновлул сукку бунни налогру гьарзану ласаврил масъалагу. Мунал тапшур бунни ттучаннай контролкассирдал аппаратру зий бушиврул ялув бацIаву дуллан.
