Щархъайх гастроллай лагаву бакъасса, Лакрал театрданул артистал занай бур каникуллал чIумал лагерьдай бигьалаглагисса оьрчIангу спектакллу ва мастер-классру ккаккан буллай.
Зулайхат Тахакьаева
Ттигъанну Буйнакскаллал райондалийсса «Данко» тIисса лагерьданий театрданул артистурал ккаккан бунни А. Усачевлул магьа «Айболит». Хъинсса хIакин Айболитнаясса магьа ччянива ххира хьуссар чIава тамашачитуран. Гьарца кIанттай оьрчIру ххарину хъатру ришлай байбишайссар, Айболитлул, жанавартрал оьрчIащал Лимпополийсса маймунгу хъин бувну, оьсса Бармалей автсса чIумал.
Спектакльдания махъ артистурал оьрчIащал дурунни викторинартту. Лагерьданул директор Ибрагьим МахIаммадаминовлул барчаллагь увкунни артистурахь оьрчIан дурсса тяхъашиврухлу.
Вава райондалийсса «Профспорт» ООО-лул биялалийсса «Космос» лагерьданий артистурал оьрчIащал бунни актершиврул магьирлугърал мастер-классру. ОьрчIру тяхъану ва гъирарай хIала бувххуна асарду аьч буллалисса, бюхъу итххяххан буллалисса тIуркIурдавух. Лагерьданул директор Зарипат Раджабовал ва хъунмур вожатая Бэлла Изиевал барчаллагь увкунни артистурахь дакIний личIансса дарсирдахлу.
