Жяматрал дянив хIурматрай бур

АьлихIажи Аьбдуллаев

[dropcap]Р[/dropcap]айондалийгу, республикалийгу бусравсса, давриву усттарсса, элмулуву хьхьичIунсса чиваркI ЧIяйннал жяматрал дянив чансса бакъар. 

Вайннаватусса ца ур Аьвдуллагьхъал Сулайманнул арс АьлихIажи Аьбдуллаев.


Андриана Аьбдуллаева
Инсаннал оьрмулуву дур­сса лайкьшивуртту, ганал тIул-тIабиаьт чIявучин хъар шай нитти-буттая, агьлу-авладрая. Мунияту, цал кутIану бусанна АьлихIажинал гьану-миналул мархрая.
Ванал ппу АьвдуллахIхъул тIисса уздансса агьулдания­сса ивкIун ур. Ва агьулданул чиваркI чурххал бюхттулсса, жангу, кьувватгу бусса, аькьлулул хьхьичIунсса бивкIун бур.

[dropcap]М[/dropcap]усихъул тIисса ниттилмур чулгу уздантураясса бур. КIивагу тухумрал чиваркI Дагъусттаннал, лакрал иширттаву гьуртту шайсса, кьини дуркний хьхьичI кьюкьлуву талай ва захIмат буллай бивкIсса бур.
[pullquote]Конкурсраву гьур­тту хьусса 33 профе­сси­о­нал суратди­хьул­т­­­раву АьлихIажинал дирхьу­сса шаннагу лишандалун буллуну бур 1,2 ва 3-сса кIанттурду. [/pullquote]
Буттал кIанттул цIанийсса Хъунмасса дяъвилий цала хушрай лавгун бур вай тухумирттая­сса вирттал. Миннава зана къавхьуну бур шама. Аьвдуллагьхъал Сулайман тIурча увкIун ур шанна ордендалул ва чIярусса медаллал хъазамгу бувцIуну. Ва ивкIун ур пулеметрал расчетрал хъунаману.

Дяъвилия махъ бусса оьрмулий зий ивкIун ур Къяннал, ЧIяйннал, СумбатIуллал школардай учительну. Цила чIумал Дагъусттаннал спартакиадалий диск лирчуну ва манзилданийх левчуну чемпионнал цIа ларсун диркIссар. Зувира шинай ЧIяйннал школалий физкультуралул дарсру дихьлай ванал ккаккан бувссар учительнал ва тарбиячинал гьунар.

[dropcap]В[/dropcap]а зузисса шиннардий ЧIяйннал школалул мудан райондалул ва республикалул лачIун буккаврил, ттуплий буккаврил ва цаймигу спортрал бяст-ччаллаву хьхьичIунсса кIанттурду бугьйсса бивкIун бур. Сулайманнул кулпат ПатIиматгу оьрчIангу бусрав­сса учитель бивкIун бур. ХIал бавкьусса, дакI-аьмал хъинсса бикIайссия тIий дакIнийн бутлан бикIай чIяйннал халкь. Сулайманнул ва ПатIиматлул наслугу нитти-буттал кьадру бусса, давриву, дуккавриву хьхьичIунсса инсантал хьуну бур. Жяматрал цIа гьаз дансса лайкьшивур­тту дурсса, цивппа бусса кIанай бусравсса инсантал бур.

Ряхвагу оьрчIая личIи-личIину бусан лайкьри. Нитти-буттал шаттирдайх лавгун, муаьллимнал пиша язи бувгьуну бур АьлихIажи тIима арснал. 1977-ку шинал мусил медальданий ЧIяйннал школагу къуртал бувну, увххун ур Дагъусттаннал университетрал математикалул факультетрайн. Му къуртал байхту Къизлардал райондалийн зун тIайла увккун, Цветковка тIисса шяраваллил школалий зий шанна шин дурну дур. Мунияр махъ зий ивкIун ур Къизлардал 3-мур школалий, Пионертурал ва дуклаки оьрчIал къатлул директорну. АцIра шинай ивкIун ур Къизлардал оьрчIал творчествалул къатлул хъунаману. Ми шиннардий шиккун заназисса оьрчIал мудан хьхьичIунсса кIанттурду бугьайсса бивкIун бур жагьил­сса натуралистурал, улча ла­хьхьултрал, техниктурал выставкарттай ва конкурсирттай. Мунияр махъгу Кордовскаллал дянивмур даражалул школалий, ахIвал кIюласса оьрчIансса интернатрай зий ивкIун ур.

АьлихIажи ивкIссар Къизлардал партиялул райкомрал кIилчинсса секретарьнугу. Чув ухьурчагу, лавайсса даражалул пишакарнан ккаллину ивкIун ур. 1985-ку шинал Къизлар шагьрулун 250 шин кIицI лаглагисса чIумал, баян бувну бивкIун бур ва даталуцIун бавхIуну хасъсса лишан дансса конкурс.

Конкурсраву гьуртту хьусса 33 профессионал суратдихьулт­раву АьлихIажинал дирхьу­сса шаннагу лишандалун буллуну бур 1,2 ва 3-сса кIанттурду. Ккуллал райондалул 75 шин бартлаг­лагисса чIумал ларайсса даражалий дурсса чIюлушиннарахлу дуллуну дур хIукуматрал наг­рада.

АьлихIажинал уссурссугу укунма итххявхсса, бюхъу-бажар бусса бур, ПатIима тIимур ссу лайкь хьусса ккарччал хIа­кинни, Мисиду ДАССР-данул лайкь хьу­сса учитель, Гульжагьра зий бур ЧIяйннал школалий 30-нния лирчусса шиннардий. Вагу Да­гъусттаннал лайкь хьусса учителли. Уссу АхIмади ур лайкь хьу­сса хIакин, цIуллу-сагъшиву дуруччаврил отличник. Ка сававсса хIакиннан ккаллину, сий дуну ур. ЦIанасса чIумалгу ва зий ур Дагъусттаннал урологиялул центрданий. Хъунмасса хIурматрай ур коллективраву ва къашайшалтрачIа. ЧIивима уссу Арсен шяраву ялапар хъанай ур. Ва ур райондалул вет­участокрал хIакин, ветеринариялул отличник.

«Илчи» кказитрай бувкссар цаппара ванал шеърирду ва макьалартту. Дин-кьуран ххуйну кIулсса ур. ХIажлийнгу лавгссар.
Цинявппагу уссурссу шяраву гьарица ишираву хьхьичIунну, жяматрачIа хIурматрай бур.
Укунсса инсантуралли шяраваллил цIа дуруччайсса.
Аьпа баннав укунсса оьрчI­ру тарбия бувсса нитти-бу­тталгу, цIуллушиву дулуннав оьрчIахьхьунгу.