Укунми дунияллийн нажагь бакъа къабуккайссар

Къалайчитал

Гьарун Саэдовлуя ттун хавар бур ттунна кIулши хьуния шихунмай. Шаэрнал, чичул, аьлимчунал, лакрал патриотнал Абачара ХIусайнаевлул кулпатраву цамур куццуй бикIангу къабюхъай­ссия.


Цал дакIний бур жуннийн аьпабиву Къисттаманнущал (Бадави Рамазановлул кулпат) бувкIуна ца бугьарасса хъамитайпа. Ганийн Къисттамангу, ганил оьрчIругу хъярчирай «баба Шура» тIий бия. Ихтилат, гьар мудан кунма, лакрал иширттая, ларг кьинирдая, литературалия бия. Баба Шурал ­(оьрус дакъая, чIяйри щарсса дия) бувсуна ттунма дакIний ливчIсса, чIун ларгукун, гьай-гьай, дакIниву ссу­ссукьу хьусса хавар. ЧIал чIумал Щардал къурух ласнащал архIал чай бурттий най буру тIар Гъумучату. Хьхьунил паракьатшивруву къурату цIуру-кIурулийсса чIурду баллай, нигьабувсун, ва лякьа цIун хьусса цулчIарив, инсаннив тIий, аглан хьуру тIар. Ялагу баллан бивкIунни тIар аьлтта гайва чIурду. Цу уру куну, цIуххарду тIар. «На бура, ПатIимат бура», — увкунни тIар. Арсгу дуснакь увну Гъумук кьаивтун, шардай Ва­ччав най дунура, лякьлул къювулул къурув урттувун дагьну ккуруйсса Гьарун Саэдовлул нину. Шай-къашай бувну, маз-кьаз бивхьуну, бювхъуссаксса паракьат бувну, шаппайн биян барду тIар ПатIимат.

ДухIин диял къархьуна тани ттун ганил бувсмур биялну чичин, цIухху-бусу бан. ОьрчIний дуниял оьрмулухун дусса кунна чIалан дикIайхха. Циксса хаварду къабусанссия «баба Шурал» ялагу жухь.

«Ттул мукьа арс уссия.
Мукьагу – мусил зунтту.
Инкьилаб хьхьири хьуну,
хьхьирил бювкьун лавгунни».

Укунсса махъру бувккун бур шюшайкун «лякьа шюршусса» Гьаруннул ниттил гъюжу дурк­сса дакIнива. Аллагь буручча, аьщун кунма, цаннаяр ца бювхъусса арсру цаннал хъирив ца оьсса кьадардай ниттил хьхьичIа ласаву. Хъуна-хъунама Бадави Да­гъусттаннал аьрали губернаторнал канцеляриялул хъунама, оьттух хьусса зувилку шиннардий Соловки лагердай ивкIуну ур. Дибир тIима, земледениялул нарком, «буржуазный националист» хIисаврай, дуснакьраву аьзавр­ду духIан къархьуну ивкIуну ур. Сайпуллагь, райондалул прокурор, гъан-мачча хIаласса къалмакъалдануву ивкIуну ур. РухIру хъинний дишиннав цал, алжаннул ххари баннав.
Гьаруннуву, махъ бакъа, Аллагьнал цалара ванал рухIираву дирхьусса харизма дур. Ххишалдаран, ва кIулми, ва ккавкми буслай бур ва ялун уругангу «чурххалгу оьвхъусса, кIюла-лахъисса, сиппатралгу ххуйсса» (Мюртазали Кьурбиев) жагьил ия тIий.

[dropcap]П[/dropcap]икри буллан бикIара, агарда Гьарун Саэдов сагъну ливчIун ивкIссания, гания гихунайгу хIукуматрал иширттавух чялишну ивкIссания, ссайн укканавав, ци хьунавав тIий. Къалахъи лаганссия Гьаруннул оьрму. ОьхIалсса зувиллий арулку шиннардил репрессиярттал кьадар­сса къатIухьхьун вагу ириянссия. Увкуну бурхха «революциялул цила оьрчIру цила бюкьай­ссар» куну. Хаснува яхI-къирият думи. Узданми. МарцIсса идеярттал хъаттирдай лехлахими.
Цамур цичIав къабувну бивкIхьурчагума («Илчи» кказитрал редакторшиву, шаэршиву, публицистшиву, революционершиву) Гьарун Саэдовлул Дагъусттаннал тарихраву цIа личIаншиврул гьассия ца «Къалайчитал» тIисса драма чичавугу. Ва хъанахъиссар дагъусттаннал литературалуву цалчинсса драма.

[dropcap]П[/dropcap]ьесалул темагу, туну, лак­ран ишласса, хъинну кIулсса дур. Жулла литературалуву чансса бакъар хIалтIухъантуран хас дурсса литературалул къат.
Гьаруннул чIивисса мутталий, хIадурна ивкIсса кунма, чивчуну бур лакрал танийсса оьрмулуцIун хъинну дархIусса темалиясса пьеса. И. Кьурбанаьлиевлул бусласаврийн бувну, Гьарун Москавлив Коммерциялул институтраву дуклакисса чIумал, гуж багьну, заэв увккун ивкIун ур. Ва ххира хьусса ванал преподавательтурал, хIарачат, гьунар бусса студент тIайла увккун ур Ставрополлайн, Ибрагьин-Халиллул тIийкун, къимиз (кумыс) хIачIлай хъин хъанан.

[dropcap]М[/dropcap]у чIумал Гьарун дус хьуну ур тихсса лакрал къалайчитуращал. Ккавккун бур гайннал захIматсса оьрму. Ккавкмуния чигу-чивчуну бур.
Драматургия литературалуву яла захIматмур жанралун ккалли байссар. Гьаруннуща бювхъуну бур, га драматургиялувугу га яла захIматмур ххуллийх лавгун, шедевралул даражалийсса пьеса най бунува чичин. Цукун къавих хьунна микку шаэртурайн, магьирлугърал зузалтрайн ссавния, Заннаяр хIикматсса ххару ликкайсса тIисса мукъурттийн.

Гьаруннул цала пьеса чивчу­сса чIумал, Аьрасатнал бусурман агьлу яхъанахъисса билаятирттай хъинну чялишну театрданул ишру щуруй бивкIссар. Миккугу хъинну хъуннасса агьамшиву хьуссар Ккавкказнаву Азирбижаннал театрданул чялишшиврул, Ураллай, Дянивмур Азиянаву татарнал театрданул хIарачатрал. Азирбижаннал театрданул асар, ххигу ххишалану, бивссар Дагъусттаннал магьирлугърайнгу, Азирбижаннавух цала маэшатрал хъирив бувккун бивкIсса лакрайнгу.

ДакI дарцIуну учинна, Гьаруннул заманнайсса тай республикарттал классиктурал пьесарду цинявппагу ца сюжетрайсса бур. Цаннах ца эшкьи хьусса оьрчI ва душ. Ца мискинсса, ца авадан­сса. Аваданми – оьсса, къудурсса, чIурукьсса, цIими бакъасса. Мискинми – дакIру хъинсса, ххуй­сса, авурсса. Гания гихунмай пьеса щаллу баву – авторнал гьунарданул даражалух бурувгун. Циняв­ппагу ца журалийсса. Цанная цаннал чивчусса кунмасса. (Масалдаран, Дагъусттаннай классикалувун багьсса къумукьнал Алимпаша Салаватовлул «Айгъази», ягу, яла, чансса махъ, жула Оьмаршаевлул «Оьмар ва Аьишат», Чариновлул «Шагьалай», «ХIажияв ва ХIабибат» ва м.ц.). Къалащаву миннуха Гьаруннул «Къалайчитурал»! Уникальнайшиву му чIумул литературалуву Саэдовлул произведениялул!
Я тамашачитурал дакI цIур­хьхьу тIутIи дансса эшкьи-ччав­рил хавар бакъар, я артистуран бигьашиврунсса, тамашалул чIюлушиврунсса балайрду ба­къар. Так захIматчитурал оьр­мулиясса бикIайкунсса хаварду. Гьарцаннал цалва пикри. Цалла дард. Цалва мурад.

[dropcap]Н[/dropcap]ава театрданул директорну бавцIусса чIумал, аьпа биву Валерий Эфендиевлулгу икьралданий, бивхьуссия жувагу цIунила-цIунил «Къалайчитал». Бюхттулсса гьунар бусса режиссер, аькьлукар, дурккучу, буттал билаятралгу, миллатралгу дардирайсса Эфендиевлул ххишала бакъа куртIсса мяъналий виттиривкIуссия Гьарун Саэдовлул пьеса. Магьирсса режиссернал трактовкалий захIматсса пишалул аьйплу бувсса инсантурая бакъая ихтилат. Ватандалия, ганил ялун бучIантIимуния, жулва аькьлулулгу, дакIнил ххазналулгу къалпшиврия, баххана хъанахъисса заманалул инсантурай буллалисса зулмулия бия. «ЛАККУ БИЛАЯТ КЬАБИТАРЧА, ЖУВА БЯЙКЬУССА КЬУРУКЬРУРУ» — ва калима дия спектакльданул лейтмотив. Хъинну ххуйсса, чIявусса куртIсса асардугу, пикрирдугу тамашачинал дакIниву чантI учин буллалисса спектакль хьуссия жула театрданул сценалий тани. Вардишсса куццуй, ссят ва дачIинний, кIира ссятрал лагрулийсса текст бакъа тIий, Валерий Эфендиевлул ляхъан дурну дуссия цаппарасса текстру бакъасса суратру. Масалдаран, хъинну дакIний ливчIунни чагурт оьрчI Камил, цIансса ду­ссукъаттагу, айизлазинасса усттаргу хъамаивтун, чаннасса хияллаву, «оьрус оьрчIру куна», велосипедрай бигьлагьисса сцена (пьесалуву ва уссар арцу дуния, велосипед ласувияв тIий). Ялагу спектакльдануву хъинну усттарну ишла дурну дуссия Гьаруннул назмурдугу. Халкь таний хъинну рязину ливчIуна. Ххуйсса спектакль хьуна.

ЦIунила цIунилгу ккалай бу­ра Гьаруннул «Къалайчитал». ЦIунила цIунилгу тасттикь хъанай бур – махъ бакъа, шедевр. Класси­ка. Жува тIурча, жула укун пахрулунсса рувхIанийсса хъуслил чIарах буклайнма буру. Муданнагусса махIатталшиву му дур, театр къабивкIсса, драматургия цирив къакIулсса миллатрачIа укун най бунува шедеврсса, кла­ссикалувун багьлагьисса пьеса чичин кьудрат дулаву. «Къалайчитал» Гьаруннул чивчуну бур вана ва хъинну драматургиялул, театрданул элму ахттар дурсса инсаннал кунма. Гьарца драматургиялул кьанунну усттарну ишла дурну.
Пьесалуву яла агьаммур конфликтри. « Къалайчитуравусса» конфликт мукун чIурусса, мукун ххарарххусса, гьар чулийнмай мархри итабавкьусса дурхха, калималия калималийн, суратрая суратрайн чIуллалисса.
КъатIайларивла, агарда хIа­кьи­нусса кьинигу жулва миллатран агьамнувасса суаллу бур вай учирча. Гьарун Саэдов «Къалайчитурал» ихтилатирттайну цалами, цалва миллатрал ялун бучIантIимунил хIакъиравусса хажалатру аьч дуллай ур.
Къалайчитал лагрулул чIи­ви­сса пьеса бур.

Му «аьй» къа­диркIссания ганий, яла ганил Дагъусттаннал сценалийсса кьисмат ххишала талихIсса бикIанссия. Амма ялагу махIатталла ва пьесалул усттарну, циняв драматургиялул кьанунну ишла дурну ляхъан баврий. Масалдаран, аьра­сатнал культуралия хавар бунан дакIнийссар А. Чеховлул махъру – «цалчинмур сценалий чIирайн ттупанг лавхъун бухьурча, махъва-махъмур сценалий га чара бакъа пIякь учин аьркин­ссар» тIисса. Ча бавну, ча кIулну бикIан аьркинссия Гьаруннун ми махъру? Ванал пьесалул цалчинсса ремаркалий бур чивчуну, «чIирай ххаржан лархъун дур» куну. Махъра-махъмур суратрай га ххаржан АхIмад щилай ур бунагь бакъасса Макьсудлуйн.

Станиславский ур оьманаву хъинманал хасиятрах луглагу, хъинманавугу циниягу ца чIиви-хъунсса зиян лякъи тIий артистнахь. Му чIумал га сипат щаллуну, оьрмулуву кунна, яргну чIалантIиссар тIий. Муна му машгьурсса режи­ссернал маслихIат дакIнийну чичлай ивкIсса хханссар Гьарун Саэдов цала пьеса. Цаягу персонаж я зиян бакъасса геройнан лайкьсса, ягу аьйлулу ишинсса бунагь бу­сса акъар. Сценалий цуппа бусса куццуйсса оьрму ва инсантал бур. Текст хъунмасса бакъанугу, гьарца персонажрая гьарзат кIулсса кунма чIалай бур.

Гьаруннул «Къалайчитураву­сса» дардру хIакьинугу, мудангу уттаранура дур.
Гьарун цува, цахьва цIуххирча, цалла цIа хъунмурчIин «Къалайчитурайну» дакIний личIанссар тIий къаикIайхьунссия (агарда та тачIаввагу мунил пикрилий ивкIхьурча).
Танал цалва миллатрайнсса оьвчаву ва васиятгу хIакьинусса кьинигу агьамнува бур:

Ххаллилсса хияллу
дакIниву бумий
Буккира майданнив,
дастта дахIира!
ЛухIисса цIаннащал
лачIун буккира!
Элмулул багърава
тIутIив риттара!
Аьзиз захIматкашнан
хъинбала буллай,
Уттиратти лухччи
цIулаган дара!

Щища шайссар ванияр ххуйну учин?!

Качар ХIусайнаева