Турциянаву, Анталиянаву, ва зурул 23-нний хьусса ментал арифметикалул соревнованиярттай цIунилгу ххув хьуну,«суперчемпионнал» статус цIакь бунни МахIачкъалалиятусса дуклаки оьрчI МахIаммад Кьагьировлул.

П. Рамазанова
Ванан 13 шин дур. Соревнованиярттай гьуртту хьуну ур 16 билаятраятусса 600 дуклаки оьрчI, миннавух 50 оьрчI – Ухссавнил Ккавкказнаватусса. КIилчинни МахIаммад ментал арифметикалул дунияллул соревнованиярттай ххув хъанахъиссагу.

ДукIу ва ххув хьуну ур Малайзиянавусса, 80 билаятраятусса 15 азара дуклаки оьрчI гьуртту хьусса, соревнованиярттай. Ларгсса арвахIкьини «Дагъусттаннал правда» кказит­рай хьусса журналистътуращал­сса хьунаакьаврий МахIаммадлул бувсунни МахIачкъалаллал аэропортрай цувагу, цащалвасса чемпионталгу лахъа-хъунну хьунабакьаврия ххарину ушиву ва республикалул парламентрал хъунама Хизри Шихсяидовлулгу, цачIанма оьвкуну, бахшишран айфон-телефонгу, Барчаллагьрал чагъаргу буллушиву. Бувсунни укунсса къулагъасрал хIарачат буллансса гъира-шавкь ххи дуллалишиву.