«Ххютула чаннайн уккан арду 37 азара ишбажаранчи»

[dropcap]И[/dropcap]юльданул 8-нний Москавлив Аьрасатнал Президент Владимир Путиннущал хьунаавкьунни Дагъусттаннал БакIчи Владимир Васильев.


Республикалул каялувчинал Президентнахь бувсунни Дагъусттаннал социал-экономикалул тагьардания.
«Жу 2018 шинал гьарза барду зузи кIанттурду, 37 азаллий 700 ишбажаранчи ххютула уккан увну. Мунийну жу тамансса арцул луртан хьун дарду. 2018 шиная шинмай 6000 инсаннан кьукьарду бакъагьавай ласлай бивкIсса пенсияртту. ЦIуницIа дурккуну, ххал дарду ххуллурду буван харж дансса арцу, утти хьунни 2,4 млрд. къуруш. Жу ишла дарду Аьрасатнал нормативру.

[dropcap]Я[/dropcap]ла ххал барду школартту, цайми объектру, миккугу цачIун дарду 2 млрд. къуруш. Газ ишла буллалиминнащалсса даву дачин дурну, миккугу 0,7 млрд. къуруш махъ дишин бювхъунни. Му ку­ццуй, жу бюджетравун ххи дарду 7-я ливчусса миллиард къурушрал. Ми арцуяту жу личIи дуллай буру 95 школалун автобусру ласунсса, 108 анаварсса кумаграл машинартту ласунсса, 50 флюорографиялул аппарат ласунсса арцу. Гихуннайгу нани дурну буру «100 школа» тIисса проектрацIунсса давуртту. ДукIу барду 117 школа. Гьашину жул умуд бур буван 200.
Жу сайки ххюлийну гьарза дуварду даруртту дузал бансса арцу. 780 млн. итабакьинну ми ласун. Цалчинмур категориялул инвалидтал ва инвалидсса оьрчI-бакI бусса кулпатру къатрал дузал буван жу личIи бан най буру 300 квартира. Ми ласунсса арцу лякъарду.

[dropcap]М[/dropcap]укунма жу личIи барду 771 млн. кIанттул ххуллурдан. ЖучIанна нанисса сайки районнал цинярда налогру жу дуларду районнахьхьун.
Социал-инженер инфраструктуралул иширттан итабакьарду 18 млрд. Ттинин, арцу диял къахъанай, бяличIан бувну бивкIсса 60 социал объект жу цIунилгу буллай байбивхьуру. Ми буллан бивкIсса чIумал жухь хIатта бакIчитал тIун бивкIуна: утти жуща бюхъанссар инсантурал иттав сивсуну буруган. 1 млрд. ва 700 млн. итабакьарду инсантал щинал дузал буван. ЖучIа захIматшиву дур агьали марцIсса щинал дузал баврил чулуха. Мунийну жул умуд бур ца 500 азараксса инсан щинал щаллу хьуншиврийн.
Байбивхьуру арцу итадакьлан шяраваллавун газ буцинсса. Цалсса итадакьарду 250 млн. къуруш».
ХIадур бувссар ХI. Аьдиловлул