ОьрчIал цIуллушиврул жаваблувшиву

Ми ци дур: накI дуривкьай, дакъарив?

[dropcap]И[/dropcap]юльданул 8-нний ДР-лул ХIукуматрал Председатель Артем Здуновлул дурсса батIаврий дуккаврил идарарттайн накI ва накIлил сурсатру даххаврил жаваблувшиву ласайсса министерстварттал ва идарарттал дунни ми иширттан хасъсса отчет.

Артем Здуновлул бувсунни цаппара гьантрал хьхьичI дурну диркIшиву паччахIлугърал ва муниципал аьркиншиндаран даххайсса дукиялул сурсатирттал ххуй-оьккишиврул ялув бацIаврил хIакъиравусса батIаву. Та чIумал ми масъалар­ттал хIакъираву дурну диркIшиву цаппара тапшурлугъру. Мунал дакIнийн бувтунни ДР-лул Роспотребнадзорданул тасттикь бувну бивкIшиву оьрчIал ба­гъирдан ва цаймигу социал идарарттан дахлахисса сурсатир­ттал сайки дачIи къалпсса (фольсификат) душиву, ягу микку накI дурагу дакъашиву.

БатIаврий махъ лавхъунни ДР-лул шяраваллил хозяйствалул ва бакIлахъиялул министр Аьвдулмуслим Аьвдулмуслимовлул. Мунал тIимунийну, республикалий накIлил сурсатру дуккан дуллай бур 62 сакиншиндарал. Шинай ласайсса 900 азарда тонна накIлил 80% дулайссар ЛПХ-лул (личные подсобные хозяйства), лирчIми предприятиярттал.

Республикалий накIлил сурсатирттаха зий бур МахIач­къалаллал «Гормолзавод» ОАО, Кизлярагрокомплекс» ОАО, «Амир-С» ООО. Багьри жулла накIлилсса лахъссар цайми регионная дучIайминнуяр, цанчирча жулла накI экологиялул марцIсса дур, цичIар хIала къадурсса.

ДР-лул дуккаврил ва элмулул министр Уммупазил Оьмаровал тIимунийну, министерствалул накI ласайссар так цалва ведомствалул идарарттан, амма гъилисса дукра дукайсса 1-4-ми классирттансса (180 азара) оьрчIру накIлил дузал байссар муниципалитетирттал. «Аьркинссар цалла даву къатIайлану бартдигьлагьисса накI дахлахиминнал сияхI дуллан, экспертизартту буллан, конкурсру баян буллан», — увкунни министрнал.

Махъ лавхъунни мукунма паччахIлугърал закупкарттал комитетрал председатель Жяъпар ХIажибековлулгу.
Артем Здуновлул уттигу цал дюъ дирхьунни министр­турай ва муниципалитетирттал бакIчитурай, оьрчIал цIуллу­шиврул жаваблувшиву миннал цайнна ласласишиврий.

Лажин хIадур дурссар
ХI. Аьдиловлул