«Ласи гъинтния лазат» тIисса щалагу Аьрасатнаву нанисса Росгвардиялул акциялул лагрулий школалийсса «Аькьлукар» лагерьданул оьрчIру хъамалу бувкIунни, МахIачкъалаллал ОМОН-лул зузалтрачIан.
Хасъсса подразделениялул базалийсса экскурсиялий оьрчIру хьхьичIва-хьхьичI кIул хьунни ОМОН-лул зузалтрал бигьа бакъасса ва нигьачIисса къуллугъращал. Экскурсия дайдирхьунни оьрчIан техника ва ярагъ ккаккан баврия. Хъунмасса хIаз лавсунни оьрчIал, бронетранспортерданул рульданухгу щябивкIун, суратру ришлай. Хъирив вайннал ххал бунни уттигъанну бувсса чак бай къатта.
Яла-яла дакIний личIансса хьунни ОМОН-лул кинологтурал шагьрулийнсса экскурсия. Кинологтурал бувсунни оьрчIахь цала ккаччив вардиш байсса куц, мукунма бувсунни цуксса хъар лахълахъиссарив ккаччал жяматийсса низам дуруччавриву. ОьрчIаща бювхъунни ккаччащал тIуркIу бангу, гайннуйх ках учингу. Ххяллайхлахъултрал каялувшиндаралу мюрщи хъамаллураща бювхъунни ххяллайх лахъавриву цала гуж ва бюхъу ххал бан.
Экскурсиялий оьрчIан кIул хьунни кьюкьлул тарихрая, микку къуллугъ буллалисса вирттаврая. Шиккусса яла хъуннамур стенд хас дурну дур къуллугърал бурж биттур буллай жанну дуллусса вирттавран. ОМОН-лул зузалтрал бувсунни оьрчIахь къучагъшиврий жанну дуллусса цала коллегахъая.
Экскурсия къуртал хьунни аьчухсса ихтилатирттахун чай хIачIаврийну. Хъамалудуш Марияннул щаллу бунни аьралитуран ххаллилсса балай.
— Хъунмасса барчаллагь тIий буру Дагъусттаннал Росгвардиялул управлениялул хъуниминнахь ва ОМОН-лул зузалтрахь цачIава экскурсия бан ихтияр дуллуну тIий ва оьрчIру цала захIматсса пишалущал кIул бувну тIий. Жугу хIарачат булланну оьрчIру мюрщину бунува Ватан ххирану тарбия буллан, Ватан дуручлачиминная эбрат ласлай аьдат бан. Ттун цайми оьрчIащалгу бучIан ччива зучIан, – увкунни «Аькьлукар» дуккаврил центрданул директорнал хъиривчу Саэма ХIажиевал.
ПатIимат Оьмарова,
ДГУ-рал дагъусттаннал филологиялул факультетрал студентка
