Ахъушиял райондалийсса лакрал щархъавасса цану дур Хъюллал шяравалу. Щар личIину хъуннасса дакъанугу, цалла шяраваллилгу, 

жяматралгу цIа лайкьну дуручлачисса кулпатру чан­сса бакъар Хъюлив. 
ЯхI-къириятрай оьрму бувтсса, захIмат ххирасса ва 7 оьрчI ччаннай бацIан бувсса Куртулавл ва Залмул хIурмат хъунмасса бур Хъюллал жяматрал дянив.
Гьашину 53 шин хъанай дур вайннал цачIу оьрму бутлай. Залмун цинна тIурча, вай гьантрай оьрмулул 70 шин бартлаглай дур.

---

Андриана Аьбдуллаева
Жагьилсса учитель Куртулав школалий зун увкIсса чIумал ва 5-мур классраву дуклакисса душ бивкIун бур. Хъунма хIал къавхьуну, Куртулав аьралуннаву къуллугъ бан увцуну, шанна шинава зана хьуну ур. Му чIумал буцин куну бур ванан 8-мур классраву дуклакисса Залму. Гьай-гьай, бигьану къабивкIун бур Залмун. Намус хъанай бивкIун бур цуппа буцин увкусса учительнаягу, му хавар кIулсса оьрчI-душвараягу. Мяйва класс буккайхту, оьрмулул 17 шинаву ва щар хьуну бур.

Цаппара шиннардий шяраву ялапар хъанайгу бивкIун, шанма мюрщисса оьрчIащал вайннал кулпат бивзун бур Къалмукьнавун. Гиккугу Куртулав цала учительшиву дуллан ивкIун ур. Ва цувагу, даврий икIу, ичIува икIу, жаваблувшинна дусса, цаярассагу, цайминнаяссагу тIалавшинна хъуннасса ивкIун ур. Ванал дарс дирхьусса Хъюллал оьрчIру хIа­кьинусса кьинигу барчаллагьрай дакIнийн утлай бур цала учитель, тарбиячи. Къалмукьнаву учительну зузисса чIумал ванал шяраваллил хозяйствалул техникумгу бувккуну, зоотехникнал пиша лавсун бур.

Мунияр махъ зий ивкIун ур личIи-личIисса кIанттурдай – зоотехникну, фермардал каялувчину. Ванал бюхъу-бажарданийну хайр-мюнпат чансса хозяйствар­ттал даража гьаз хьуну бур. Ца хозяйство хьхьичIуннай хъит учин дайхту, махъун дагьмунийн тIайла уккай­сса ивкIун ур. Укун, Куртулав ца кIаная ца кIанайн гьан уллай, вайннал кулпатран Ставрополлал крайрай, Ростовуллал областьрай ялапар хъанан багьну бур. Шярава лавгун махъ Куртулавл ва Залмул дянив мукьва оьрчI ялагу хьуну бур. Кувннал хъирив кув нанисса 7 мюрщи­сса оьрчIащал шартIру дакъасса кIанттурдай хъуннасса хозяйствагу дачин дурну, биялсса захIмат бишин багьну бур Залмун. Хъуними оьрчIругу интернатрай ккалай, так бигьалагай кьинирдай бучIайсса бивкIун бур шаппай.
ЧIявусса кулпатирттаву хъунмур гьиву хъаннил хъачIунттай дикIай, ужагърай чани, нахIушиву, гъилишиву хIасул дуллалимургу хъамитайпа бикIай, оьрчIру тарбия баврил хъунмур хъаргу ни­ттихъайн дагьай.
Вана укун, ца цIуру-кIуру къаувкуну, ласнал бувцунийн занай, ци шартIирдай бухьурчагу, цила тIюва усттарну дурурччуну дур Залмул.
Мадара шинну кьатIухгу дур­ну, кулпат зана хьуну бур МахIачкъалалив.

Амма ши­кку хъунма хIал къабувну бур. Куртулавлуйн шярава школалий зун оьвтIун бивкIун бур. ЦIана вай Хъюлив ялапар хъанай бур — Куртулав школалий биологиялул, химиялул, физикалул дарсру дихьлай, Залму тIурча муданма кунма ужагъ ядуллай.
Мадара тия-шиягу бивщуну, захIматшивуртту ккаккарчагу, утти, захIматгу дузрайн бувккун, оьрчIалгу, оьрчIал оьрчIалгу ххари буллай, ялапар хъанай бур Куртулав ва Залму.
Цинявппагу лагма лавгун, лахъа-хъунну кIицI лаган ччай бур оьрчIру цала аьзисса ниттил юбилей.
Бувсса кьинигу барча дуллай, чIа тIий буру жугу Залмун цIуллушиву, ххари-хъин­шивуртту.