Хъинма итан тахгу бакъасса, оьма утан кIаланггу дакъасса ва уттисса заманнай духтуртурал даврия рязий бакъасса, аьйрду дуллалисса ихтилатру кказитирттай, социал сетирдайгу биял­сса бикIай. Амма цикссагу бур кIяла халатравусса инсаннал бурж лажин кIялану бартбигьлагьисса, давриву дакI дирхьуну зузисса медициналул зузалт.

ПатIимат Рамазанова
Укунминнал кьюкьлуватусса цану бур 1-мур ЦIувкIратусса, «Ветеран» тIисса бугьараминнансса ва мушакъатминнан­сса интернатрай хъунмур медсестрану зузисса Кьурбаннул душ Дукиева Асиятгу. Медициналул училищагу къуртал бувну, ва 1986 шинал Къизлярдай стоматологиялул поликлиникалий зий бивкIун бур, 1996 шиная шинмай зий бур ялув кIицI лавгсса идаралий. Гьамин, Асиятлул хIарачатрайнур интернатрайн ччя-ччяни лакрал балайчиталгу бугьарасса инсантал тяхъа буккан буван бучIайсса.

[pullquote]Жулва Дагъусттаннал агьали цивппава дакIру сахаватсса бур.[/pullquote]

Хасну жул ЦIувкIратусса активистътал МахIаммадшарип Сайдуев ва Шарапи Ажуев ччя- ччяни гьуртту шайссар интернатрай­сса байраннай. «Жул даву цукун-дунугу дувайсса даву дакъар, жу мудангу хIарачат бувару интернатравусса инсантурал цIуллу- сагъшиврухагу дагьайкунсса аякьа дуван, цала ичIува ша­ппа бусса куннасса тагьар хIасул дуван,- тIий бур Асият Дукиева.- Жулва дагъусттаннал агьали цивппава дакIру сахаватсса бур, чIявусса бучIай байраннал гьантрайгу, укунмагу ссайгъатирттащал, нацIу- кьацIулущал. БучIай Дагъусттаннал театрдава, вузирдава, школарттая.

[pullquote]
Ванил жул дакIру тирх учин дувай, жу ва ччя-ччяни жула ялун бувх­ния тIун бикIару.[/pullquote]

Ххувшаврил байрандалул гьантрай , масалдаран, бувкIуна 40-мур школалул дуклаки оьрчIру завуч Абакарова Убайдатлущал, интернатрал клубраву ккаккан дувайссар концертру. БувкIуна предприниматель Мадина Акаева кондитер продукциялул кьуцурттащал, ва ччя- ччяни бучIай. Бур цаймигу предпринимательтал, чIун- чIумуй бучIайсса. БувкIуна «Аьрасатнал нитти­хъул» тIисса ккурандалул Дагъусттаннаймур отделениялул вакилтал СаллатIтурал ниттихъал комитетращал. Учин ччисса мура, бугьараминнал ва мушакъатминнал интернатру хIакьину ургала акъа ливчIминнан къулай­сса тIювар, хIукуматралгу, дакI цIуцIисса инсантуралгу къула­гъас дуссар. Культуралул программартту дуссар, жучIа зузимигу, цала гъанминнаха кунма, аякьалий буссар».

ДакI хъинсса, гьарцаннащал хIал бавкьусса Асият коллективравугу, вайннал даврий ялувбацIаву дусса социал идарарттайгу хIурматрай бур. «Аьчух­сса, хъярч- махсара бан ххирасса ванил жул дакIру тирх учин дувай, ва ялун бувхния тIийнма бикIару», — тIий бур интернатравусса агьлу.
[pullquote]Ялгъузминнал виха бувайцири зукьлурду Заннал тIайла бацIан баннав![/pullquote]
Асият ттущал архIал ца класс­раву дуклай буссия, ччя- ччяни хьунабакьару. Ванил бувайсса гъалгъагу хъунмурчIин цачIавасса бугьараминнаясса бикIай, жунгума кIулссар циксса инсантал буссарив, цума цукунсса хасиятрал уссарив. Кувний «бити ми вила къартту- къужрича, цамур хаваргу буси» тIий, жу къюллан бивкIукун: «Ттул оьрму къари-къужраву бур, жува цинявппагуру хъунив хьунтIисса», — учай Асиятлул. ИчIувацириннахьгу укунма учин багьай тIун бикIай.
Вай гьантрай Дагъусттаннал захIматрал ва социал лябуккулул министерствалул Асият Дукиевал чIярусса шиннардий дакI марцIну бувсса захIматрахлу лайкьсса кьимат бивщуну, ванин дуллунни ХIурматрал грамота. ДакIнихтуну барча буллай буру жулва Асият.

Виха ялгъузминнал бувай­цири зукьлурду тIайла бацIан­нав!