Аьрали пишалухсса гъира

«Росгвардиялул зузалт­ращалсса каникуллу» тIисса акциялул лагрулий ва Конституциялул кьинилуцIун бавхIуну, аьрали частьрал личIисса бригадалул

базалий (Ухссавнил Ккавкказуллал округрал национал гвардиялул аьрал) хьунни ДОСААФ-рал школалий дуклакисса оьрчIащалсса аьраяллил ва патриотизмалул мероприятие.

---

Ва хьунни «БивкIу бакъасса полк» суккушиндарал региондалул координатор Илдар Кьадиевлул сипталий. Ши­кку гьуртту хьунни Къизлардал мэр Александр Шувалов, Къизлардал райондалул бакIчи Александр Погорелов, шагьрулул военкоматрал вакилтал ва диндалул агьлу.
Разведроталул аьралитурал ккаккан бунни хъамаллуран ярагъуннищал ва аьрали техникалущал зун бикIайсса куц. Цала пишакаршиврул даража кка­ккан бунни кинологтуралгу. Аьра­ли шагьрулувухсса экскурсия бувну махъ оьрчIал ва хъамаллурал ххал бунни аьрали савлугърал музей. Шикку вайннахь бувсунни частьрал гьану бивзния шинмайсса тарихрая, къуллугърал бурж биттур буллай жанну дуллусса ва паччахIлугърал наг­радарттан лайкь хьусса аьралитурал къучагъшиврия. Мунияр махъ частьрал клубраву хъамаллуран ккаккан дунни Росгвардиялиясса документал фильм.
Ахирданий цинявппа хъамалу хьунни саллатIнал кухнилий тIивтIусса авадансса ссупралух.
Частьрал командир подполковник Шамил Ахкубековлул бувсунни укунсса хьунабакьавуртту цачIара ччя-ччяни шайшиву.
— ОьрчIру гъирарай бучIай­ссар жучIан. Жугу вайннан дакIний личIансса экскурсиярду бару, кIул бару аьрали оьрмулущал, зузалтрал багьу-бизулущал, хIарачат бару оьрчIавун аьрали пишалухсса гъира бутан, — тIий ур Ш. Ахкубеков.

Аьпалул хьуми дакIнийн бивчунни

Къизилюртлив, районнал дянивсса вневедомственный къаралданул отделданий хьунни ванияр 12 шинал хьхьичI оьрмурдацIа хьусса 4 зузалал аьпалун хас дурсса мероприятияртту.
Милицанал прапорщик Муратхан Бахтияров, хъунама сержант Оьмар Исрапилов, сержант Рамазан Халилов ва чIивима сержант МахIаммад Аьлиев оьрмурдацIа хьуссар 2007 шинал июль зурул 18-нний, Къизилюртливсса школалул стадиондалий, физподготовкалул дарсру дихьлахьисса чIумал, пIякь учаву хьуну. Ва кьини 10 инсаннайн щавурду дирссар.
Аьпалул мероприятиялий гьуртту хьунни ливтIуминнал кулпатру, гъан-маччами, дус­тал, даврил уртакьтал, мукунма шагьрулул ва райондалул администрациялул, военкоматрал, шагьрулул ветерантурал совет­рал вакилтал.
Подразделениялул хIаятра­вусса гьайкалдануцI дирхьунни тIутIив.
— Вай цала къуллугърал буржру дакI марцIну бартбигьлагьисса ххаллилсса зузалт бу­ссия. Хъинну къащи хъанай дур укунсса зузалт жула дянива лавгун. Жу мудангу вайннал кулпатирттал чIарав буссару, жущава шайсса ка-кумаг буллантIиссару, — увкунни отделданул хъунама, полициялул подполковник Аьбдул ХIапизовлул.
Оьмар Исрапиловлул буттал МахIаммадэминнул барчаллагь увкунни отделданул зузалтрахь ва каялувчитурахь аьпалул хьу­сса коллегахъул хъамакъабитлай тIий ва миннал кулпатир­ттал чIарав бацIлай тIий.

ДачIи шинал хIасиллу

Национал гвардиялул аьралуннал Ухссавнил Ккав­кказуллал округрал хъунаманал хъиривчу, полициялул генерал-майор АьвдулхIаким ХIажиевлул каялувшиндаралу Каспийскалий хьунни вневедомственный къаралданул, Лицензияртту ва ихтиярду дулаврил (ЛРР) ва паччахIлугърал ялув бацIаврил кIанттул органнал каялувчитуращалсса семинар-совещание.
Шикку гьуртту хьунни Да­гъусттаннал Росгвардиялул хъунама, полициялул генерал-майор МахIаммад Баачилов, ДР-лул виваллил иширттал министр, полициялул генерал-лейтенант Аьвдурашид МахIаммадов. Гьашину дачIи шинай подразделениярттал дурсса даврил хIасиллу дуллалисса ихтилат бунни Аьв­дулхIаким ХIажиевлул.
— Ухссавнил Ккавкказнаву вневедомственный къаралданул подразделениярттал ябуллай буссар личIи-личIисса журалул 33 азаллий 659 объект. Миннувух бур инсантурал хъус дусса ва цивппа ялапар хъана­хъисса кIанттурдугу. Ряхва зурул дянив вневедомственный къаралданул зузалт гьуртту хьуссар халкь мюхчан бан ва жяматий­сса низам дуруччин багьлагьи­сса 358 мероприятиялий, 1715 тIулдакъашивуртту дурсса инсан иян увссар кIанттул виваллил иширттал органнайн. Му бакъассагу, вай гьуртту хьуссар объектирдал категорияртталсса ва паспортиртталсса буллалисса 1125 ххал бигьавурттавух, — кунни Аь. ХIажиевлул.
Совещаниялий ляличIинува кIицI лавгунни ярагъ ишакаш баврил ялув бацIаврил масъала.
Ахирданий, уттиния тихунмай къулагъасралун ласун­сса масъаларттугу кIицI лавгун, хьхьи­чIунсса зузалтран бахшишру дунни.

Ччувччунни ницIайхъуварал къатIри

КIирагу ведомствалул ца­чIуну баян бувсса «Мак – 2019» тIисса профилактикалул операциялул лагрулий Дагъус­ттаннал Росгвардиялул ва Наркотикру закондалуцIун къабавкьуну ишакаш баврил управлениярттал зузалтран лявкъунни Самурдал вацIлуву вахIшисса ницIайхъува ххявхсса 23 кIану. 1242 ницIайхъуварал къатIа, ччувччуну, бат бунни.

Оькьлакьисса жагьил ххассал увну ур

Росгвардиялул аьраличу, полициялул хъунама лейтенант Низам Талибовлул хха­ссал унни хьхьиривун оькьлакьи­сса оьрчI. Ва иширая кIул хьунни ххассал увсса Аь.Эльгамлул Аьра­сатнал Росгвардиялул каялувчитурал цIаний гьан бувсса чагъарданийну.
Июнь зуруй агьамсса паччахI­лугърал объектру буруччай­сса Москавуллал соединениялул аьра­личу Низам Талибов отпускалий цала ватандалийн Дарбантлив увкIун ур. Та кьини ва цала кулпатращал Каспий хьхьирил зуманив игьалаглай ивкIун ур. ХIаписарнан хIисав хьуну бур щинавун бучIлачIисса жагьилтуравасса ца хъунмасса хIаллай щинавату ялун къауклай ушиву. Ва ххявххун ур жагьил хха­ссал ан. Цаппара минутIрава Низамлул щинал куртIнивун кIункIу увсса жагьил зуманив уккан увну ур, бувну бур мунан цалчин­сса кумаг. ХIаписарнал мугьлат бакъа ва сант кIулну дурсса даврийну жагьил хха­ссал ан бювхъуну бур. Росгвардиялул каялувчитурайн чивчу­сса чагъарданий ва цалагу, нитти-бутталгу цIания барчаллагь тIий ур къучагъсса хIаписарнахь.

ХIадур бувссар
Андриана Аьбдуллаевал