МахIачкъалаллал пучрал хъунмур отделениялий хьунни Аьрасатнал Виричу МахIаммад НурбахIандовлун хас дурсса
конвертирттал презентация.

Андриана Аьбдуллаева
М. НурбахIандовлул виричушиврий жан дуллуну шанна шин бартлагаврицIун бавхIуну, итабакьунни ванал суратращалсса 300 азарва конверт.
Презентациялий гьуртту хьунни Дагъусттаннал БакIчи Владимир Васильев, Дагъусттаннал Виваллил иширттал министр Аьвдурашид МахIаммадов, Виричунал бутта НурбахIанд НурбахIандов, Дагъусттаннал «Аьрасатнал Почта» идаралул хъунама МахIач МахIаммадов.

Утти Виричунал цIа кусса конвертру биянтIиссар Аьрасатнал цинярдагу пучрал сетирдайн. Конвертрай дирхьуну дур М. НурбахIандовлул сурат ва медаль, ккаккан дурну дур ванал чин ва оьрмулул шинну. Ва кьинилуцIун бавхIуну, «Аьрасатнал Почта» идаралул хIадур бувну бур виричунал инициаллащалсса, «Зузияра, уссурвал» тIисса ванал махъругу бусса хасъсса штемпель.
Мероприятие тIитIлай, ихтилат бунни МахIач МахIамма­довлул.
— Жу итабавкьусса конвертру ппив хьунтIиссар Аьрасатнал цинярдагу регионнайх ва миннул цал ттигу дакIнийн утантIиссар жула Виричу, — увкунни ванал.

Владимир Васильевлул барчаллагь увкунни «Аьрасатнал Почта» идаралул каялувчитурахь ва ххаллилсса даврихлу. Цала ихтилатраву респуб­ликалул БакIчинал бувсунни террористал НурбахIандовлул увкусса «Зузияра, уссурвал» тIисса махъру бусса парча бат бан ччай бивкIшиву видеолия, амма ихтиярду дуруччай органнал хIарачатрайну хьумур кIул бан бювхъушиву. — ХIакьинусса мероприятиялул ххишаланугу исват буллалиссар жула чIарав бушиву, щияркIуй личIи бакъа чIалачIисса, иш багьсса чIумал, дунияллийх цIа ларгсса вир­ттал хьун бюхъай­сса инсантал, — увкунни Владимир Васильевлул.

Виричунал буттал барчаллагь увкунни ва давриву гьурттушинна дурсса цинявннахь. Ванал кIицI лавгунни ва кьини цала кулпатран хъинну захIматсса кьини душиву, муницIунма арснацIасса пахрулул дакI дуцIлайгу дикIайшиву.

Аьвдурашид МахIамма­довлул бувсунни, 1992 шиная байбивхьуну, оьрмулуцIа хьушиву 1418 виваллил иширттал органнал зузала.
— Вай гьарицагу кьини къу­чагъшиву ккаккан дуллай бивкI­сса инсанталли. ХIа­кьинусса кьини виваллил иширттал органнаву зузиминнавугу укун­сса чIявусса буссар. Вай, хьхьу-кьини къаувкуну зий, жула республикалий паракьатшиву дуручлай буссар, — увкунни министрнал.