Лак Лаккуя бизан бувну 75 шин шаврийн

Гъумучату Ваччав нанисса аьраххуллул ялтту чулий, ЯтIувахъайн лахъан хъунма иш къаливчIсса кIанттай, янилун дагьан бюхъай­ссар шяраваллия лирчIсса лекьрурду, куцру – кIикку диркIссар ТIюхчардал шяравалу.

Бусласаврих бурувгун, кIикку шяравалу салкьи хьуну дур XI ттуршукулий. Цаппара тарихийсса чичрурдал тIимунийн бувну, аьраяллил ишру ххуйну кIулсса Аьвдуллагь-баг тIисса тIюхчарачуначIа чIавану унава талатаврил, тур рищаврил ус­ттаршиву лахьлай ивкIссар тIар Гъази-Гъумучиял Чулахъ Сурхай-хан. Яла махъ цанма щарну бувцуну ивкIун ур ХIажи-Аьйшат тIисса кIанал душгу. КIаницIассар ивкIсса тIий бур бусалалийн кIура ав­сса жула Хан-Муртазялигу.
ТIюхчардал агьлу мадара чялишну хIала був­ххун бивкIун бур Аьрасатнаву хьусса революциялул иширттавухгу. 1917-ку шиналла ТIюхчарав зий диркIун дур 11 инсанная сакин хьусса коммунист ячейка, мунил бакIчинугу ивкIун ур Магьди Худайнатов – Саэд Габиевлул хьхьичIунсса дус-ихтивар. 1931-ку шинал сакин дурну диркIсса ТIюхчардал колхозгума диркIун дур Худайнатовлул цIанийсса.

[dropcap]Ч[/dropcap]чянира шиннай жяматрал дянив ишлану диркIун дур маэшатрал хъирив хIалтIилухун лагаву – къалайчиталну, дув­ссилул ва ярагъуннил ус­ттарталну. ХъунмурчIин лагайсса бивкIун бур Азирбижаннавун. Так ца ЗакIатIаллайгума арулцIалку шиннардийн бияннин яхъанай бивкIун бур ТIюхчардал 40 кулпат. ЧIярусса шиннардий ЗакIатIаллал «Горторграл» директорну ивкIун ур МахIаммада Мусаев.
Биялсса тIюхчар яхъанай бивкIун бур Туркманнавугу – Чаржав шагьрулий. Тикку бивкIминнавасса ­Оьмар Абасов хъанахъи­ссар архну гьузуй лагаврил Да­гъусттаннаясса цалчин­сса капитан. Исмяил Минкаилов зий ивкIссар Чаржавуллал военкоматрал хъунаману.

Лаккуя арандалийн бизан бувсса 1944-кусса шинал ТIюхчардал шяраву бивкIун бур 80 къатта-къуш. Зунттавугу, яла ЦIуссалаккуйгу ТIюхчардал колхоз диркIун дур ца яла хьхьичIунминнувух. 1970-ку шинал му колхозрая дурну дур винсовхоз – «Тухчарский» тIисса.
ЦIуссалаккуй ТIюхчар­дащал архIал ца шяраву цачIун хьуссар ЧIаящиял жяматгу – Билтаул тIисса мичи-ххичнал кьадиртсса шяраву, цIагу ТIюхчар дирзссар.
Мура цIанилу кIивагу жямат хIакьинусса кьинигу, кувннай кувгу бавкьуну, нахIуну, хIалалну яхъанай буссар цIусса миналий – Новостройрай.