Дагъусттаннал ЗахIматрал ва социал хьхьичIуннайшивурттал министерствалул дузрайн дуккан дуллай бур «Демография» тIисса миллатирттал проект.
Имара Саидова
Пенсиялийн буккаврил чIун хъунна даврийн бувну, Аьрасатнал Федерациялул ХIукуматрал хIукму бувну бур пенсиярттайн буккан гъан хьусса инсантал зунсса экономикалул ва социал давурттал шартIру хIасул дансса.
Ванийн бувну «Демография» миллатирттал проектрал лагрулий сакин дурну дур пенсиярттайн буккантIиминнал оьрмулул шартIру къулай даву мурадрайсса «Дугьарамур ник» тIисса проект.
Проектрал агьаммур чарангу хъанай бур бугьара хьусса инсантурал оьрмурду лахъи баву мурадрайсса хIасиллу дузал даву. Проектрайн бувну, пенсиярттайн буккан чIун гъан хьусса инсантал давурттайн кьамул баншиврул, лахьхьин буллан най бур миннан пишарду ва дуллан най дур квалификация ларай даву мурадрайсса ххишаласса кIулшивуртту.
Программалул шартIирдайн бувну, проектраву гьуртту хьун бюхъан тIий бур 50 – 60 бивсса оьрмулул арамтал ва 55 -60 бивсса оьрмулул хъами. Шивун бухлай бур зузисса ва давурттах луглагисса пенсиялийн буккан чIун гъан хьусса инсантал.
Проектраву гьуртту хьун ччиминнаща аьрза булун бюхъайссар цивппа ялапар хъанахъисса кIанттурдайсса давурттал щаллу байсса Центрданийн.
Мукунма Центрданийн бучIан бюхъайссар цала предприятиярттай зузисса инсантурал квалификацияртту ларай даву мурадрайсса, зузалт давурттал дузал буллалисса каялувчитал.
Пенсиялийн буккан чIун гъан хьусса инсантурал квалификация ларай даврийну, ягу миннан пишарду лахьхьин баврийну лавай хьунтIиссар инсантурал ахIвал-хIал ва миннан жяматийсса иширттавух гьуртту хьунсса сант ххишала хъанахъиссар.
ХIакьинусса кьини ЗахIматрал министерствалул дурсса хъирив лаявурттал чIалачIи бунни пенсиярттайн буккан чIун гъан хъанахъисса инсантурал кIулшивурттал ва пишардал даража лавай бан аьркинну бушиву.
Проектрай гьуртту хьун ччиминнаща гьарта-гьарзану кIул бан бюхъайссар ДР-лул ЗахIматрал министерствалул пишарду лахьхьин баврил ва агьалинащалсса давуртту дачин даврил отделданийхчIин.
Оьвчин бюхъайссар
тел.: 64- 24 – 75
