[dropcap]И[/dropcap]юльданул 1-нний ДР-лул БакIчи Владимир Васильевлул дунни АьФ-лул ПаччахIлугърал советрал зузи подгруппалул видеоконференцсвязьрал журалийсса батIаву.Муний ххал бивгьунни ишбажаранчишиву чаннайн дуккан даврил ва ххютулусса экономикалийн къарши буккаврил масъалартту. ДакIнийн бутанну, Дагъусттаннал БакIчи хъанахъиссар му ххуллий зузисса подгруппалул давурттахлу жаваб дулайману.

Владимир Васильевлул бувсунни подгруппалуву гьуртту хьуминнал аьдад 37-нная 40-ннайн лархъун душиву ва ми ккаккан бувну бушиву Аьрасатнал 27 субъектрай. «Жулла давурттал мурад хъанахъи­ссар ххютулусса экономикалийн къарши буккаврил мюнпатну зузисса система дузал даврин хасъсса хIукмурду хIадур баву», — увкунни республикалул каялувчинал.
Му ххуллий дуллан аьркин­сса давурттал хIакъиравусса цалвами пикрирду бувсунни подгруппалул члентурал. Пермуллал улк­лул экономикалул министрнал 1-ма хъиривчу Алексей Григорьевлул пикрилий, аьркинну дур хасъсса налогру ласаврил низам, бигьагу дурну, ца куццуйн, ца системалийн дуцин. Мунийну бюхъанссия бизнесраву отчет дулавугу бигьа дуван, хаснува чIиримур ва дянивмур бизнесраву. Мунал мукунма бувсунни аьркинну душиву куклу дуван ишбажаранчитуран админист­ратив гьиву ва чан дуван отчетирттал лагру.

Му сипталуцIун акьлай ушивугу кIицI бувну, Дагъусттаннал БакIчинал увкунни: «Жу байбивхьуссару бизнесращал уртакьшиврийсса арарду дузал дуллан. Му дахIавриву жу чул бишланну бизнесрая бюджетравун нанисса налогру гьарза хъана­хъаврийн, жу тIурча жула чулуха дузал дулланну давурттал аьчух­шиву, арцу мюнпатну харж дуллалаву».

БатIаврий махъ лавхъунни мукунма Аьрасатнал Стратегиялул сиптардал агенствалул вакилнал. Мунал тIимунийну, Аьрасатнаву зий бур цифралул платформа дузал давриха, бизнес ва власть хIала-гьурттуну зуншиврул. Ва дикIантIиссар электрон журалул луртан, ми­ккун билаятрал циняв регионная тIайла дуклантIиссар цалла лабизавуртту. Яла бизнесчитурал буруккинттарайсса масъалартту ххал бигьлантIиссар федерал министерстварттал ва ведомстварттал даражалий.
БатIаврий гьуртту хьунни ДР-лул ХIукуматрал Председательнал 1-ма хъиривчу ХIа­жимахIаммад ХIусайнов, вице-премьер Екатерина Толс­тикова ва цаймигу.