Премьера

Премьералул щала коллектив Ширвани Чаллаевлущал

Итникьини Лакрал театр­дануву хьунни Гьарун Саэдовлул «Къалайчитал» пьесалул премьера. Му цIусса ххуллу-ххуттай бивхьунни Москавлиясса режиссер ПатIимат Ма­хIачевал.

Зулайхат Тахакьаева
Премьера хас бувну бур Гьарун Саэдов дунияллийн увккун 125 шин, аьщун ивзун 100 шин ва «Къалайчитал» пьеса чивчуния шиннай 105 шин шаврин.
Спектакль байбишин хьхьичI Аьрасатнал магьирлугърал лайкь хьусса ишккакку Гулизар Султановал бувсунни Гьарун Саэдовлуя, «Къалайчитал» пьесалул тарихрая ва мунил Лакрал театрданул оьрмулуву ци кIану бувгьуссарив. КIицI лавгунни пьеса дахьва чивчусса шинал Гъумук драмалул кружокрал бивхьуну, муния шинмай байбивхьуну бушиву Лакрал ва щалагу Дагъусттаннал драматургиялул тарих. Уттинин пьеса бивхьуну бур мукьилва личIи-личIисса режиссертурал. Махъва-махъ — 1991 шинал аьпабиву Валерий Эфендиевлул.
— Оьрмулул кьура шинаву­сса жагьилнал чивчуну бур кла­ссикалул произведение, бивкIу бакъасса произведение. Пьеса хIакьинусса кьинигу тIалавну лявкъунни, муниву миллатрал цIуцIи кIантту бюхханну кка­ккан бувну буну тIий, — увкунни Гулизар Султановал.

АхIмадлул роль дургьусса артист Аслан МахIаммадов

Аьрасатнал магьирлугърал лайкь хьусса зузала Качар ХIусайнаевал кIицI лавгунни ца актрайсса чIивисса пьеса бухьурчагу, «Къалайчитал» хъинну куртIсса, цила багьайкунсса классикалул произведение хъанай бушиву.
Ихтилатру бувуна Дагъус­ттаннал Чичултрал союзрал хъунама МахIаммад АхIмадовлул, шаэр Ссугъури Увайсовлул, Гьарун Саэдовлул цIанийсса фонд­рал хъунама Давди Увайсовлул.
Спектакль бивхьунни цIусса ххуллу-ххуттай. Спектакльданул режиссер, Гьарун Саэдовлул ссил арснал душ, ПатIимат МахIачевал бусаврийн бувну, миннал мачча-гъанми революциялул щатIуву ватандалия лихъа бувккун, кIанттул хьуну бусса бур Италиянаву, Австралиянаву ва цаймигу кьатIаллил билаятирттай.

Союз кунпаякун хьусса 90-ку шиннардия шиннайгу мура кьини дуркIун дур СССР-данул гьарцагу республикалул инсантурал бакIрачIан. Чансса ба­къар миннавух лакгу.
Чил миллатирттал дянив дяр­ххун ларгсса цIусса никиран кIулну бакъар цала мархри. Мукун байбихьлай бур спектакль, Италиянал шагьрулий. Тамашачитуран цIу бутIуй бувчIлай ба­къар италиянал кулпатрал «Къалайчитал» спектакльданущал ци дахIаву дуссарив. Так цалчинмур бутIул ахирданий аьл­тту хъанай бур, тахсир бакъа­сса инсан ивкIуну, авлия хьусса, «Къалайчитал» спектакльданул персонаж АхIмад кIичIираву ца хъамитайпалун лявкъуну, гичча бакIрайн багьну бушиву Италиянавун. Тих танал наслулун кIулну бакъар цала мархха-ххун чассарив. КьюлтIмур буслай бур АхIмадлул дневникрал. Муния тинмай байбихьлай бур «Къалайчитал».

Спектакльдануву ишла бувну бур Аьрасатнал халкьуннал артист Ширвани Чаллаевлул музыка. Сценография Аскар Аскаровлул. Агьамми роллу дургьуну бия Аслан МахIаммадов (АхIмад), Луиза Шагьдилова, ПатIимат Давидова, Аьбдул Мурадов (Аьли), Зинаида Чавтараева; Ибрагьим Мусиев (Макьсуд), Адам Гайдаев (Кьурван), Ислам МахIаммадов (Камил), Малик Щамххалов (Илияс).
Режиссернал агьаммур чIур­чIав дурну дур жагьилтал мархрая ябуцаврий. Спектакльданул ахирданий экрандалий кка­ккан дурунни «Ттул мархри ла­ккуйри бусса, кIай кьукьирча, на бяйкьусса кьурукьра» тIисса му­къурттищалсса Гьарун Саэдовлул сурат.
Хъиривмур кьини спектакль ккаккан бунни Гъумук.