Нацпроектирдал бущи хIурхIа лаган битан къабучIиссар

Июльданул 5-нний АьФ-лул ХIукуматрал Председательнал 1-ма хъиривчу – АьФ-лул финансирттал министр Антон Силуановлул Перм шагьрулий дунни «ЗахIматрал лябукку ва зузи кIанттурду дузал баврицIун кабакьаву», «ЧIиримур ишбажаранчишиву ва ишбажаранчишиврул сиптардацIун кабакьаву», «Дунияллул халкьуннал дянивсса кооперация ва экспорт» тIисса национал проектирдал хIакъиравусса батIаву.


БатIаврий гьуртту хьунни ДР-лул БакIчи Владимир Васильев, АьФ-лул экономикалул министр Максим Орешкин, Аьрасатнал федерал министртал, регионнал бакIчитал.
2018 шинал АьФ-лул Президент Владимир Путиннул цIакь дурссия 12 национал проект. Национал проектирдал цIакь був­ссар 2024 шинайннинсса АьФ-лул стратегиялул лябуккулул задачартту ва мурадру.

БатIаврий махъ лахълай, Антон Силуановлул бувсунни яла агьамми масъаларттуну хъана­хъишиву ишбажаранчитурая ма­хъуннайсса дахIаву ва национал проектру дузрайн дуккан дайни хIасул хъанахъисса ма­съалартту. Мунал тIимунийну, аьркинссар дузал дуван бизнесран къулайшивуртту дусса шартIру – аьрщарал участокру личIи даву, ми инфраструктуралуцIун дазаву ва м.ц. Ми шартIру щаллу даврийну гьарза хьунтIиссар зузи кIанттурду, инвестицияр­тту, ялунсса производствартту ва экономика лядуккаву.
Муния махъ батIаврий бизнесрал вакилтурал буллунни суаллу, Финансирттал министрнал ва гаймигу властьрал федерал органнал вакилтурал дуллунни миннухьхьунсса жавабру.