Инвестициярттал мугьали гужлан хьунтIий бур

Июльданул 3-нний Дагъусттаннал БакIчи Владимир Васильев хьунаавкьунни «Россети» ПАО-лул гендиректорнал хъиривчу, «Россети Северный Кавказ» идаралул гендиректор Виталий Ивановлущал. Миннал ххал диргьунни Дагъусттаннал электросетирдал комплексрал лябуккулул тагьар, мунил ялун бучIантIимур ва мукунна «Россети ПАО-лул инвестициярттал программа дузрайн дуккан даврил хIалкьазия. ЛичIину ххал диргьунни МахIачкъала токрал дузал баврил ма­съалартту.


Масъалалул агьамшивугу кIицI дурну, Владимир Васильевлул бувсунни респуб­лика энергиялул щаллу баврил тагьар захIматну душиву. Мунал хъамаличунахь барчаллагь увкунни дукIу «Россетирдал» Дагъусттаннай ученияртту дурну махъ, токрал дузалшинна хъин чулиннай да­ххана шаврихлу ва кIинттул чIумал чанирду, хьхьичIми шиннардий кунма, чIявуну лещан къабуллалаврихлу.

Виталий Ивановлул бувсунни цаллами планная: «ДукIу жу республикалул давурттан харж дуварду 2 млрд. къурушрая лирчусса арцу. Гьашину тIурча, харж дуван най буру 1,8-1,9 млрд. къуруш. Жу зий байбивхьуру.
ЧIяруми инвестицияртту харж хьун тIий дур Дарбантуллал электросетру низамрайн дуцинну. Къулагъас чан къадантIиссар республикалул ливчIми зонардахгу.
Гьашину инвестициярттал мугьалттул 10-15-ла гьарза дантIиссар производствалул программарттансса харжлугъру, ми цIана итадакьлай дуссар. Ми харжлу­гъирттайну муштаринан токрахсса тарифру лахъ къабантIиссар», — увкунни «Россетирдал» каялувчинал.
Хьунабакьаврий тIимунийну, гьашину республикалул 41 райондалий низамрайн дуцинтIий дур токрал ххаллу, дакьин дан тIий дур 4605 километра гьаваллавусса ххаллал, 1543 трансформатор ва 99 подстанция.
Бувсунни мукунма, цукунсса давур­тту дан тIий буссарив 2019-2023 шиннардий.
ХIадур бувссар ХI. Аьдиловлул