Кьаландаровхъал кулпатрал чивчунни 50 «Илчи»

Мариян Кьаландарова хъамалу «Илчилул» редакциялий

Кказит чичин лирчIун дур ца нюжмар.

Зумаритавал байрандалул гьантрал хъиривсса зузи кьини жул редакциялийн бувкIунни Бархъаллал шяраватусса ишбажаранчи Расул Кьаландаровлул кулпат,Мариян Илиясовал цIанийсса «Дараччи» фондрал Москавливсса филиалданул хъунмур Мариян Кьаландарова – дачIи шинайнсса 50 кказит чичин­сса ссай­гъатращал.


Кьаландаровхъал кулпат хасну Бархъаллал цIанихсса магьирлугъ ядувангу, хьхьи­чIуннай дувангу биял­сса бутIа бивхьусса кулпат бур, вайннал уттинингу Бархъалав, культуралул фестиваль дакъагу, дунни цайми-цаймигу хайр-мюнпатрансса давурттив, буллай бур шяраву Магьирлугърал чIалъаьгу.

Вайннал спонсоршиву дурну, бувккунни дунияллийн хъин-хъинсса луттирду. ЦIа-бакI кIицI малагару куну бивкIун бунугу, барчаллагьрай кIицI лаглай буру Кьаландаровхъал кулпатрал цIа.

Ва ялагу. Вайннал алвагьсса тIул хъиндайдихьу хьуну, цала-цала шяраваллавун жула миллатрал кказит чичавансса, ка-кумаг бавансса цайми-цаймигу чан къашаванссар тIисса умуд­райгу буру.