ХIасан КIурухов
Чаннал ва тIинттал байран
Чаннал ва тIинттал байран
ТIиртIунни ххяххабургъил.
Ттул Лакку билаятрай
ТIутIал кIутIу тIий дур гъи.
Ттуруллал ттангъарагу
Ххал хъанай дакъар чувчIав,
Чаш дурксса ниттихьгу на
«Нюжмардий увкIра» учав.
Сайрданий бур яругу,
Барзунттая къабатIлай,
Мурчал дюхлулсса кагу
Дирхьунни ненттабакIрай.
Къудурну къуццу тIий бур
Хъюву ажаригума,
Доклад буккин нанисса
Хъунасса хIакин кунма.
***
Синс ливксса багъраву
сил щусса тIутIив,
Хъартусса аьрщарай хъахъисса чIапIив.
Вана цал уттигу ссут зана шавай,
Вана асардацIа дакIгу лицIавай.
Бяхълай бур мурхьругу
лиргьусса кьанив,
Язугъну зурзу тIий, зизлай бур чIапIив.
Бургъил ва рангирдал тIуркIулун кIанай
Марч бур, саил кунма,
бухкIуллух бацIлай.
Тти цIаннай дашрулийн
цIий бур базурду,
Исватну чIалай дур чIумул дазурду.
Так дяркъу, так къюву
най дур тти хьунийн,
Бивну бур оьрмугу ссутнил зуманийн.
***
Оьмал-БакIул бакIрая
Уруганна лагмава,
Увччу хьуннин хIачIанна
ШамратIаясса гьава.
Майдан Вихьуллаарийх
Цал ттигу ябитанна,
МурцIуиттав кьюрчусса
Макьгу личин ританна.
Ттун ватан ххирассар тIий,
Ганз къабулланна хъуру.
Ххирар тIий, ххяхха буклай
КъабивкIссар буттахъулгу.
Амма диркIссар гайннаву
Хъит-шит чансса чувшиву.
Хъуни махъру къабуслан
Яхъанансса хъуншиву.
Азардахъул шиннардий
Хъун дурссар гайннал Ватан,
Шайвавлий жущарагу
Гайннал кьариртмур ядан?
Вана Вихьуллал щарнийн
Бургъил тIинтту зизавай,
Нава шикку лявхъусса
Щукру хъунасса Заннайн!
***
ЛарчIунни гъинтнил гъарал,
ЧIурдал кIунтIру чIа буллай,
ЧIувусса щинал синттай
ЧIюлусса макьан руцлай.
Хъирив ца чIавадушнил,
ЧIавахьулттил та чулий,
Итабавкьунни балай
Ттюнгъа-гъилисса чIуний.
Балайлуву махъругу
Ччиссаннал лавмартрая,
Циваннив аьтIийнмасса
Зунттал авдалтурая.
Агь, чанна шай, чанна шай,
Дарщусса дакIнил кьарал,
Ватандалийн ларчIукун
Гъинтнил гъилисса гъарал!
Гъапул лавгсса асардан
МалхIан кунма савав шай
Гъаралух тIуркIу тIисса
Гъилисса гъарал шай-шай.
Базурдангу дарув шай
Гъарал тIинттал галайгу,
ЧIавахьулттил та чулий
ЧIавадушнил балайгу.
***
Лихъан буллай ура щугълурдавату,
Лихъан буллай ура, хъама битан ччай,
Вил мютIисса мурчал гъилисса хъатру,
Ккуртри багьсса кIизул
кIукIлусса хъюлчай.
Хъамагу битара, архгу буцара,
Баслай, бахьлагара тунтсса ххютавун.
Нагу аьжаивну игьалагара,
Пахъшивугу дагьай ттул пикрирдавун.
Амма, ца лахIзалий хьхьарагу хьуну,
ЦIунилгу ххараххай гара га къюву,
Вил чурххал тIин бусса гъилисса хьхьуну
ДакI цIунцIу тIий дачай
цIаннал лякьлуву.
***
Чун бувкIра тти инагу,
Бунагь бакъа нузручIий,
Вила чанна асарду
Ттул цIаншивурттайх кIучIин?
Тти вингу къулай бивзрив,
КIяла арцул гюнгутIий,
Мадара тийн-шийн щусса
Ттул бурцIил щунщуматIи?
Аман, цими ччувччурвав
Ттул дакIнивасса цIарал,
Цими ххюнчIа бувгьурвав
На палцI дурсса къерттарал!
Вила чурххал бияла
Буллунни ина ттухьхьун,
Инава биривунна
Ттул тамахIрал къатIухьхьун.
Тти вин мукун ччихьукун,
Вин ччимур буллай ура,
Ччучлай лагивуй, дакIнил
Къакьаритай ва тура!
***
Бявкъунни, гъав лавгунни
Бюхттулний бургъил бурул,
Хъахъи гьухъа лавххунни
Ссутнил цалчинсса зурул.
Лахьхьу-цархьхьуя дусса
Гъилисса гъи чагъирай,
Лахьхьу-цархьхьуяв бусса
Инагу ттучIа, ххирай.
Ттигу гъи дурассар тIий,
Багьайкун ччамар къабав,
Ина абад ттулар тIий,
Уччиннин хIаз къаласав.
Тти мурччив ккухIлай ура,
Ци зунссарив къакIулну,
Махъругу най бур ттува
Мяъна дакъа къакруну.
Ттул дакIгу кюру хханссар
Гъилишиврул кьабивтсса,
Лелуххант левххун лавгун,
Абадлий бачIва ливчIсса.
***
ЗанадиркIунни чIунну
Ккуллардал сир-сир тIисса…
Ай-гьарай ва замана
Ттигу ттухь цири тIисса?
Биялзурухь дур дунъял
ОьхIалшиврун щар хьусса,
Ялун дагьну дур ссавгу,
Ттул дакI кунна дарщусса.
Янсаврал кьанкь рирщунни
Кьабагьсса гьаварацIа,
ЦIунилгу хьхьичI бавцIунни
ЦIансса кьинирдал вацIа.
Баллай бур хавардугу
Оьттул ттурлих къанихсса,
Аьс увайсса хIатI кунма,
Оьнкьарах чIуллалисса.
Хъит-шитлий дур ттул рухIгу,
ЧIумул къума-цIан дурну,
Ххалаххул мицIлийх лархсса
ЧIимучIалттул зумуну…
***
Ххярххун най дур ттуруллив
Хан ккацрал илхъи кунна,
Ссутнил кьини дуркIун дур
Гъинтнил дядизу дуна.
Хьхьемавххунни ххютаву
Ардай оьрчIи рангругу
Гьутру аьвсса тта кунма,
Хяв-хяв тIий бур бурангу.
Гьава кунна, ттул дакIгу
ТачIав цалий къадацIай,
ЛирцIуну, аьчну дуна
Цакуну цIаннал дуцIай.
Хан ккацрал илхъи кунна,
Ххяххай хажалатругу,
ГъапI куну чIири личIай
Дунияллул лагругу.
Бухсса диван
Дарусса гъинтнил кьини, Вихьлив
Лагабургъил дурцIусса ларзулу,
Аьпабиву, буттал танийва лавсъсса
Бухсса дивандалий
ЩябивкIун бур:
Ттул нинугу, щарссагу, душругу
Ца бухсса дивандалий –
Ттул лавгмургу, хIакьинусса кьинигу, бучIантIимургу.
Ца бухсса дивандалий –
Ттул талихIгу, ччавугу, вихшалагу.
Ца бухсса дивандалий –
Ттул щала оьрмулул мяъна,
Ттул щала дуниял.
Хъунмашиву ва чIивисса дивандалул!
