«Ятинтал бакъасса Дагъусттан» тIисса организациялущал цачIуну, чирилул акция хIисаврай, ятинсса ва мушакъатсса оьрчIан Лакрал театрданул ккаккан бунни магьа «Айболит».

ОьрчIру гъирарай ххал буллай бия спектакль. Ххарину хъатру ришлай бия, Айболитлул кумаграйну жанавартрал оьрчIал оьсса Бармалей ух айхту.
Спектакль къуртал хьуну махъ организациялул директор Раисат ХIусмановал барчаллагь увкуна Лакрал театрданул каялувчитурахь ва артистурахь, чIярусса шиннардил мутталий цала буллали­сса ихIсандалул акциярттал чIарав бацIлай бушиврухлу. Дуллунни хIурматрал грамотарттугу.
Театрданул жанахIраву «Познание» тIисса Арт-Студиялул сакин бувну бия сурат дишаврил мастер-класс. Бялахъан­сса программа хIадур дурну дия Санкт-Петербурглиясса Дунияллийх занази театрданул актриса Елена Дертевал.
«Фабрика праздника» компаниялул клоунтуралгу биялну бялахъан бувна оьрчIру. «Метелица» тIисса компаниялул хъамалу бувна оьрчIру мороженыйрдайну.