[dropcap]И[/dropcap]юньдалул 21-нний Дусшиврул къатлуву жула региондалий­сса Щалагу Аьрасатнал халкьуннал фондрал отделениялул активистътурал шинал мутталийсса давурттал хIасиллудуллали­сса гьарта-гьарзасса мажлис хьунни. Ваний гьуртту хьунни ДР-лул БакIчинал ва ХIукуматрал администрациялул каялувчи Владимир Иванов, ДР-лул ХIукуматрал председательнал цалчинма хъиривчу Анатолий Карибов, министерстварттал ва ведомстварттал каялувчитал, республикалул шагьрурдаясса ва районнаясса вакилтал ва личIи-личIисса сакиншиннардал волонтертал.

---

[dropcap]М[/dropcap]ажлис тIитIлатIисса ихтилатраву Владимир Ивановлул кIицI лавгунни хIакьинусса кьини билаятрал иширттаву Халкьуннал фронтрал хъинну агьамсса ва аьркинсса кIану бувгьуну бушиву.

Бувсунни ванал Дагъус­ттаннай ттинин щурущи дур­сса агьамсса проектругу, дузрайн буккан бан бювхъусса цаппара масъаларттугу ОНФ-лул активистътурал гьурттушиву дусса бушиву. Мисалдаран, ххуллурдал хIакъиравумур проектравун, жула агьулданулгу гьурттушинна дурну, ласун бювхъуну бур республикалул ххуллурдай бакьин бан багьлагьисса 749 кIану. ХIакьинусса кьининийн вайннува бакьин бувну бур ххуллурдал 174 бутIа.

[dropcap]В[/dropcap]ладимир Ивановлул мукунма кIицI бунни ОНФ-лул активистътурал хъуннасса гьурттушинна дуллалишиву республикалул шагьрурдай ва районнай лахъ къатрал хIаятру, кучарду, паркру, скверду бакьин буллалисса давурттавухгу.
Бувсунни ОНФ-лул гьурттушиндарайну ларгсса шинал рес­публикалий тIивтIушиву 8 школа ва 3 щинаххуллу. ХIакьинусса кьини ва программалийн лавсун бусса бур тIитIинсса ва щурущи бансса 60 объект.

[dropcap]Р[/dropcap]еспубликалийсса активистътурал дурсса давурттал хIасиллая ва вания гихуннай дан дакIнийсса давурттая кутIану бувсунни отделениялул штаб­рал сопредседатель ва Госдумалул депутат Оьмахан Оьмахановлулгу.
Ихтилатирттая махъ хьусса ххал бигьавурттаву активистътурал гьаз бунни ялув кIицI бувсса проектирдавасса цаппара кIанттурдугу. Мисалдаран, экологиялуцIун бавхIуми ихтилатирттаву активистътурал тIалав бунни «Ак-Гель» ва «Грязевой» тIисса кIивагу бяр, миннун ляличIисса статусгу дуллуну, Дагъусттаннай дуруччин аьркинсса тIабиаьтрал зоналувун ласунсса чаранну лякъин.

[dropcap]М[/dropcap]укунма кIулшивуртту дулаймур тематикалийн багьайми ихтилатирттавугу ххал бивгьунни, школарттан ва оьрчIансса кружокру дачин дурсса идарар­ттан «хъахъи» автобусру итабакьлакьисса давуртту лахъи гьан къариртун, кIантту-кIанттурдай чIумуй щаллу дуллалавугу.
Аьмну Дагъусттаннай­сса отделениялул активистътурал хIадур бунни гьаз бан­сса ва миннуха зунсса 22 масъала. Ччясса мутталий вайннул сияхI чирчусса чагъарду Республикалул БакIчи Владимир ВасильевлучIан биянтIиссар.