Республикалул цIусса прокурор ивтунни

Андрей Ежов

[dropcap]И[/dropcap]юньдалул 17-нний МахIачкъалалив хьунни ДР-лул Халкьуннал Мажлисрал 37-мур сессия.Му бачин бувну ия парламентрал спикер Хизри Шихсяидов.


Сессиялий ххал бивгьунни 29 масъала. Миннувасса ца агьаммур бия Андрей Ежов ДР-лул Прокурорнал къуллугърай итаву. Му итан ккаккан увну ур Аьра­сатнал Генпрокурорнал.
АьФ-лул Генпрокурорнал хъиривчу Андрей Кипотлул кутIану бувсунни цIуну къуллугърай итлатиманал захIматрал ххуллурдая.

Андрей Ежовлул депутатътурахь бувсунни цува Дагъусттаннал прокурор Денис Поповлул каялувшиврий зий ивкIссаксса хIаллай прокуратуралул давурттал сакиншинна тамансса даххана хьушиву, республикалий законшиву щаллу даврин хасъсса прокуратуралул даву дуллантIий бушиву аьчухну, граждан обществалул институтирттащал ва мурадлувсса паччахIлугърал органнащал хIала-гьурттуну.
Дагъусттаннал депутатътурал циняв рязину кьамул бунни му хIукму.

Яла «Единая Россия» партиялул вакил Рамазан Мирзаевлул парламентрал спикернахь тавакъю бунни Къизлардал ва Чачаннал Республикалул дазуй хьусса иширая бусан. Хизри Шихсяидовлул бувчIин бунни тикку хьусса авара ссайн бувкссарив. Спикернал тавакъю бунни жагьилтурахь паракьатшиву дуруччин, ссавур дуван, ссивцIу бичлачиминнал му­къуйх къабуккан.
Муния махъ депутатътурал кьамул дунни цаппара законнал проектру.