[dropcap]Г[/dropcap]ьашину, июнь зурул 1-нний, КIуруххъал ХIасаннун бартлагантIиссия 65 шин.

ХIасаннул бутта Шяъван ва ттул бава ХIурия уссу ва ссу бия. Вайннал ялагу уссия КIурух тIисса уссу.
ХIасаннун Аллагьналва бул­луну бия пагьму шеърирдайну лагмасса дунияллия инсантурахь буслан.

---

Ттун, циваннив къакIулли, ххан бикIайва шаэртурал хъуни­сса бакIру бикIан багьлагьисса кунма. Амма ца кьини, МахIаммад- Загьид Аминов ккаккайхту, бувчIуна чIивисса бакI бусса инсаннащагу дуниял карамат дуван бюхъайсса шеърирду чичин шайшиву.

[dropcap]Я[/dropcap]лагу на чуврив ца луттирай бувккуссия инсаннал нярал бувагу 3% бушиву зузисса. Гайми зузи бансса мугьлат цачIанма бучIаннин ялугьлай бикIайссар тIар.
ХIасаннул дунияллий дирчу­сса 62 шин хъинну чансса шиннуя. ХIазран бакъахьунссар учай­сса: «Оьрму – му чирахъри, ччимур чIумал лещан бюхъай­сса», — куну.

ХIасаннул оьрчIшиву ларгссар Вихьуллал шяраву. Ванан дурагу 6 шин дусса чIумал, ванал бутта, га чIумалсса Вихьуллал колхозрал председатель, Шяъван, машиналул авария хьуну, ахиратравун лавг­ссар. ХIасаннул ниттин Сиянатлун багьссар цинмалу кIия арсгу, кIива душгу ччаннай бацIан буллан. Ца шинава Сиянатлун багьссар ялагу ца кьюртIи кьюлтI учин – Зулайхат тIисса 11 шинавусса душ бивкIулул хьуссар.
ХIасаннул Вихьлив къуртал бувссар школа. Бувккуссар Да­г­ъусттаннал пединститутрал филологиялул факультет. Къуртал був­ссар Москавлив Горькийл цIанийсса Литературалул институт.

ХIасаннул шеърирду, тIай­лассар, цаппара инсантуран цукуннив ттярзлий, ваца ватан къа­ччан хьуни кунма чивчуну чIалан бикIайва. Гай бяйкьлакьиссая. КуртIсса пикри дакIний бувгьуну чивчусса шеърирду ттирикIин хъинну захIматссар. Масала, оьруснал хъунасса шаэр Борис Пастернаклул шеърирду ттуща, циксса ккалай ухьурчагу, захIматну бакъа лаласун къашай.
Мисаллу буцлай, кказитрал чIапIив ХIасаннул шеърирдал дуцIин къадулланна. Амма ца-цавай инсантуран кьянатсса билаятну чIалачIисса Лакку билаятрая ХIасаннул чивчусса шеърирдал тасттикь буллай бур ва цавагу чулуха кьянатсса ба­къашиву. Гьай-гьай, Лакку билаятрай яхъана­хъисса инсантал чан хъанай най бур. Учин бю­хъай: «Му яхъанан ххуйсса кIану бивкIссания, ми инсантал мия къалихъланссия», — куну. Укунсса зат дакIнин багьлагьимагу аьйкьлакьисса инсанни.
Ца чIумал, дакIнийри ттун, совет заманалул цIанихсса чичу Чингиз Айтматовлул куна: «Ва адаминал (Горбачевлул) жу­хьхьунна дириян дурсса хIалу жура ишла къадуварча жула-жула миллатирттал ахIвал-хIал, культура, буллугъшиву хъит учин дуван, жува личIантIиссару на ттула литературалул асардаву кIицI бувсса манкъуртъталну», — куну.

ХIасан акъая «манкъурт». Ванал буттал шяравусса цала нитти-буттая аьпалун дир­сса къатри хъинну ххуйну дакьин дуруна, ччима хъамаличу кьамул уван бюхъайсса даражалийн дурцуна. ХIасан «къаувкуну» ия шагьрулул бигьа оьрмулул. Ахиратравун гьаннин ца-кIира шинал хьхьичI, на, мукьцIалла шин шагьрулий яхъа­найгу дурну, шяравун излази­сса чIумал, ХIасаннул увкуна: «Нагу учIанна вичIан яхъанан, пенсиялийн уккайхту», — куну. Амма, пенсиялийн уккайхту, пасат дансса цIуцIаврил бас увну, ХIасаннул пикрирду барткъалавгунма ливчIунни.

Амма ттулла ци ххаришиву дикIай учирчарив, ХIасаннул вания тихуннайсса муданна­сса мина Лакку билаятрай, буттал шяраву, хьушивриясса дикIай. Буттал билаят – му жула кIилчинмур динни. МуничIан кIункIу тIавугу хъинну хъуннасса дуссия ХIасаннуву. Цибанссар, Аллагьнал жунна дуллу­сса кьинирдаяр ххишаласса жущара дунияллий дичин къашай. Хъунасса Заннал луттирай чирчусса кьинирду цащава бювхъусса кьяйдалий дуртссар ХIасаннулгу.

ХIакьину ва жула чIарах занай акъахьурчагу, ванал цала дакIнил щаращуя щин рутIлай ххяххан бувсса аькьлу-кIулшилул ххаругу жулами дакIурдивугу миналул хьуну личIантIиссар.
Аьпа баннав вил, ххирасса ттул ссурахъуй!
ХIажимурад ХIусайнов
Вихьул, 2019 ш.