Аьрасатнал юстициялул министрнал май зурул 22-нний бувсса хIукмулийн бувну, Дагъусттан Республикалул Федерал къуллугърал судрал приставтурал Управлениялул хъунаману ивтунни Аьлилов Алик Мирзабаглул арс.
Имара Саидова
Приставтурал управлениялул зузалтращал цIуну ивтсса каялувчи кIул уллалисса мажлисрай гьуртту хьунни ДР-лул БакIчи Владимир Васильев, АьФ-лул хъунмур судрал приставрал хъиривчу Владимир Воронин ва республикалул ихтияр дуруччай органнал структурардал каялувчитал.
Владимир Ворониннул, цIуну ивтсса каялувчинан хъуннасса жаваблувшинна дусса даврий тIайлабацIугу чIа увкуну, тапшур дунни къуллугърал удостоверение.
ЦIуну ивтсса каялувчи барча уллай, Владимир Васильевлул кIицI лавгунни судрал приставтурал къуллугъ тIайлашиврул ва мюнпат бушиврул лишанну хъанахъишиву.
— БувчIлай бур хIакьинусса кьини жула республикалий цуксса захIматну буссарив тIайлану ва закондалул ххуллийсса масъалартту щаллу буллан. ТIайлассар, жугу хIакьинусса кьини жулва хьхьичI бивхьусса масъалартту закондалул ххуллий биттур баврил ялув кьянкьану бавцIуну буссару, мукунма щаллу дуллай буссару судрал исполнительтурал къуллугърал буржру дузал баву мурадрайсса шартIругу, — увкунни Владимир Васильевлул.
Ванал миккува кIицI лавгунни цукунчIав инсантурал ихтиярдугу ссуссукьу дан къабучIишиву.
Яла, Алик Аьлиловлул къуллугърал даврил ятIапирттаягу бувсун, В. Васильевлул дуллунни ванан республикалул яла бюхттулмурну хъанахъисса «Дагъусттаннал Республикалул цIанийсса лайкьшивурттахлу» тIисса награда.
Алик Аьлиловлул барчаллагь увкунни цала даврин лавайсса кьимат бищаврихлу ва жаваблувсса къуллугърай каялувшиву дансса вихшала цайнна дишаврихлу.
ДакIнихтуну барча уллай буру республикалул лавайсса даражалул пишакар, жула миллатрал лайкьсса арс, Хъусращиял шяраватусса Мирзабаглул арс Аьлилов Алик, Дагъусттан Республикалул Судрал приставтурал управлениялул каялувчину итаврийн бувну ва «Дагъусттан Республикалул цIанийсса лайкьшивурттахлу» тIисса бюхттулсса награда ласаврийн бувну.
ЧIа тIий буру вин цIуллушиву, тIайлабацIу!
«Илчи» кказитрал редакция
