[dropcap]И[/dropcap]юнь зурул 18-нний МахIачкъалалив «Юнтас» тIисса банкет бай залдануву шадлугърал даражалий махъва-махъсса гюнгутIул байран кIицI ларгунницIуллу-сагъшиврул ссуссукьушиву дусса оьрчIан. Гьашину Республикалул Дистанцион кIулшиву ласаврил центрданий 11-мур класс къуртал бунни 29 выпускникнал.

---

Имара Саидова
ОьрчIахь ххуллухъин тIутIисса мажлисрай гьуртту хьунни Центрданул директор ХIажимурад ХIусманилаев, завуч Милена Якьубова, «МарцIсса дакI» тIисса ихIсандалул фондрал вакилтал, учительтал ва оьрчIал нитти-буттахъул.
— Ххирасса оьрчIрув, хIакьину на мукIруну ва ххарину ура, зу оьр­мулул захIматшивурттахьхьун рай къабуллуну, зуяту Центрданул цIа бюхттул дансса инсантал хьунссар тIий. Цамур чулухагу, пашманну ура зуяту личIи хъанай тIий. На зун чIа тIий ура цIуллушиву, дуллалимуниву тIайлабацIуртту.

Хъуна­сса Занналгу зуцIун ка бакьиннав. КIулну бикIияра гихунмайгу Центрданул учительтал мудангу зул чIарав бацIан хIадурну бушиву, — увкунни ХIусманилаевлул.
Выпускниктуран ва хъамаллуран ххаллилсса бахшишну хьунни дагъусттаннал эстрадалул балайчитурал концертгу.
Балайрду увкунни ва школалул оьрмулувасса асар хьунсса сценкартту ккаккан бунни Центрданул выпускниктуралгу.

ДакIнийн бутанну, Республикалул цIуллу-сагъшиврул ссуссукьушиву дусса оьрчIансса дистанцион кIулшиву ласаврил Центр тIивтIушиву 2009 шинал ДР-лул ХIукуматрал бувсса хIукмулийн бувну. Гьашину Центрданун хъанай дур 10 шин. ХIакьинусса кьини микку кIулшивуртту ласлай бур 50-нния лирчусса районнаясса ва шагьрурдаясса 425 оьрчI. Шикку зий ур 183 пишакар.

Центрданийсса педагогтал зий буссар цIуллу-сагъшиврул ссуссукьушиву дусса, школалийн занан къабюхъайсса оьрчIан ккаккан дурсса программалий ва миннан къулайсса графикрай. Центрданул сияхIрайсса оьрчIан 11 класс къуртал баннин ичIува ишла буллан булайссар ттизаманнул оборудованиярттал щаллу бувсса компьютерду, лазерный принтер, сканер, цифрардал микроскоп, фотоаппарат ва графикалул планшет.

Дянивмур даражалул программагу щаллуну лархьхьуну, аттестатгу лавсун, шикку кIулшиву ларсъсса оьрчIаща дуклан буххан бю­хъайссар ччимур ссузравун ва вузравун. Центрданул итабавкьусса выпускниктал хьхьичIунну дуклай бур Аьрасатнал хьхьичIунсса вузирдаву. ХIасил, цIуллу-сагъшиврул мушакъатшиву дусса оьрчIан ва хъанай бур оьрмулул ххуллурду тIитIлатIисса Центрну.
ЦIана Центрданийн кьамул буллай буссар республикалул районнаясса ва шагьрурдаясса оьрчIру.
Кьамул баншиврул щаллу бангу аьркинссар ялавай кIицI лавгсса документру:
1. Нитти-буттал ягу опекунтурал чулухасса аьрза;
2. Компьютердал техникалий зун ихтияр дусса справка;
3. Психиатрнал чулухасса справка;
4. Мушакъатшиву тасттикь дуллалисса МСЭК-рал справка;
5. ОьрчI ялапар хъанахъисса кIанттаясса справка;
6. ОьрчIал бакIрал чагъар;
7. ПМПК-лул заключение.
Гьарта-гьарзану цIухху-бусу бан оьвчин бюхъайссар Аскерхановлул кучалийсса Центрданул телефоннайн:
67-41-08;
8-960-421-18-81 (тех.отдел);
8-928-671-01-17 (директорнал хъиривчу)
67-40-88 (кьамул бай къатта).