Аьрщарал кьимат цукссари?

Июньдалул 19-нний ДР-лул ХIукуматрал батIаврий ххал бивгьунни республикалий паччахIлугърал аьрщарал кадастр кьимат бищаврил масъала. ДР-лул ХIукуматрал председатель Артем Здуновлул бувсунни му даву дуван аьркинну душиву ччясса мутталий – ва шинал ахирданийнин. Мунал тIимунийну, му хъанахъиссар Щалвагу Аьрасатнал лагрулий­сса даву. Микку зун оьвкуну бур хьхьичIунсса пишакартурайн ва экспертътурайн.

Дагъусттаннай объектирдал кадастр кьимат бищаврил даву цукун сакин дурну дуссарив бувсунни ДР-лул аьрщарал ва хъуслил арардал министр АгъарахIим КьагьирхIажиевлул. Мунал тIимунийну, гьашину кьимат бищун аьркинну бур 1 млн. ва 664 азарва объектран, миннувату капитал строительствалулсса – 702 азарва, шяраваллил хозяйствалул аьрщив – 140 азарва, шагьрурдал ва шяраваллал аьрщив – 822 азарва. Даву дуллалиссар «Дагтехкадастр» ГБУ-лул. Министрнал бувсунни мукунма цуми шагьрурдай циксса объектру буссарив кадастр кьимат бищун аьркинсса. Артем Здуновлул тавакъю бунни дуллалисса даврил хIакъираву агьалинахь буслан. Кьимат бищаврил даву цукун дуллантIиссарив бувсунни «Дагтехкадастр» ГБУ-лул каялувчинал буржру чIумуйсса бартбигьлагьима Александр Беднягиннул.
Дагъусттаннал ХIукуматрал председательнал хъиривчу Екатерина Толстиковал бувсунни «Дагтехкадастр» идаралул захIматшивурттая ва ми духлаган дувансса ххуллурдая.