Узданну яданну жула ужагъ

Ххуллункьини июнь зурул 15-нний ххаллилсса даву дунни Ккурккуллал шяраву.
Шикку хьунни махъсса шиннардий аьдатравун дагьсса, шяраваллил ккурчIа-кIичIиртту марцI буллалисса субботник.

Ва акциялий гьуртту хьунни щалагу щарнил жямат. Тамансса жагьилтал бувкIунни МахIачкъалалиягу.
Ссят 9.00 хьусса чIумал шяраваллил ккурчIав бавтIунни хъунимигу, мюрщимигу. Шяравалу бутIра-бутIрайх дарчIуну, сайки 100 инсан цанма ккаккан бувсса кIанттурдай зун лавгунни. Лагма-ялттусса кIанттурдугу марцI бувну, дайгьузанну дунни шяраваллил кьуллалийн ва инсантурал къатравун щин нани­сса щаращал лагма. МарцI бунни чIярусса шиннардий ка къарщуну бивкIсса, жяматрал ччюрк дичайсса, кIанттурду.

Мичча дукьан дурсса ччюрк, 500-ксса дарваг, КАМАЗ бувцIуну, Лаващав, ми ччуччайсса хасъсса кIанттурдайн диян дунни. ДукIу-кIулссанура шяраваллил агьамсса кIичIирттаву дирхьу­ссия ччюрк дичлансса урнарду. Му кьини миннул ялун цIусса цаймигу дирхьунни.

Субботник къуртал хьуну махъ, шяраваллил ккурчIав кIункIур бивзун, бунни ххаллилсса пулав. Шиккува бувну, мюрщи оьрчIайх бачIлай бия попкорн ва нацIу памма. Ахирданий ккурчIав цинявннан ккаккан дунни киносуратгу.
Ва ххаллилсса даврил сиптачину ва сакиншинначину хьунни Москавлив ялапар хъанахъисса ккуркличу СалихI ХIажиев. Субботникрай ванал цалагу чялишну гьурттушинна дунни.
Ккурклив укунсса субботникру дуллантIиссар гьарица шинах.

Лажин хIадур дурссар
Андриана Аьбдуллаевал