Поэзиялул ясир бувми

Шагьрулул Республикалул КIулшивуртту дулаврил управлениялий хьунни шагьрулул школарттайсса ниттил мазрал дарсирдал учительтурал творчествалун хас дурсса вечер.БакIрайва бусан, шагьрулул КIулшивуртту дулаврил управлениялул сипталийн бувну, учительтурал творчествалун хас дурсса вечер цалчинни дуллалисса. МуницIунма бавхIуну, итабавкьунни миллатирттал мазурдил учительтурал шеърирду цачIун бувсса «Поэзиялул тIилисиндалул ясир бувми» тIисса ххаллилсса жужгу.

Имара Саидова
Творчествалул мажлис бачин бувну бия методикалул отделданул хъунмур Разият АбакархIажиева.
Гьуртту хьуминнавух бия жула миллатрал душругу: 16-мур школалул учитель Аьлиева ПатIимат, 12-мур школалул учитель МихIадова Оксана ва 56-мур школалул учитель ХIажимахIаммадова Земфира.

Учительтурал творчествалун кьимат бищун бивтсса жюрилувух бия: Дагъусттаннал педагогикалул университетрал Ниттил мазру хьхьичIунмай баврил центрданул директор МахIаммад НурмахIаммадов, Дагъусттаннал халкьуннал шаэр Аминат Аьбдулманапова, Чичултрал союзрал секциялул каялувчи Илияс МахIаммадов ва яру­ссаннал халкьуннал шаэр Залму МахIаммадова.

Буниялагу, цаннаяр ца гьунар бусса ва итххявхсса бия гьуртту хьун бувкIсса циняв­ппагу учительтал.
Оьрмулул дязаннив дунияллия лавгсса буттахасса ва буттал улклухасса назмурду дурккуна «Шинал учитель» тIисса конкурсрайгу хьхьичIунсса кIану бувгьуну бивкIсса ПатIимат Аьлие­вал.
Дяъвилий талай ивкIсса цила буттал чувшиврухасса ва къуртал хьуну махъ бувсса захIматрахасса шеърирду був­ккуна Къяниятусса Земфира ХIажимахIаммадова.
Уттигъанну Москавлив хьусса щалагуаьрасатнал конкурсрай кIира номинациялий хьхьичIунсса кIанттурду бувгьусса Ххюлусматусса Оксана МихIадовал бувккуна буттал шяраваллихасса шеъри.

Вечерданий гьуртту хьун бувкIсса учительтурал мукунма бувсуна цанма шеърирду чичлан байбишин савав хьусса иширттая.
Учительтурал творчествалул мажлисран лавайсса кьимат бивщуна КIулшивуртту дулаврил управлениялул хъунаманал хъиривчу Зумруд Багъдуевал.

— На хIакьину барчаллагь учин ччай бура ва ххаллил­сса даврил сиптачитурахь. ДакI ххари хъанай дур школарттай зузисса учительтал цала пиша куртIну кIулшивруцIун, поэзиялул чулухунмайгу гьунар бу­сса бушиврийну. МукIруну бура укунсса учительтал зузи­сса школарттай дуккаврил даражагу лавайсса бушиврий. Зу кунмасса патриотътал буссаксса ниттил мазурдийн диллали­сса нигьачIавугу чансса духьурчагу чIири личIлачIиссар. ЧIа тIий бура зун гихунмайгу зун­сса ва чичлансса гъира-шавкь», — кунни Багъдуевал.