Дмитрий Курочкин: «ХIакьину диялну дакъар инвестициярттал луртан»

Июньдалул 25-нний ДР-лул БакIчи Владимир Васильев гьуртту хьунни Аьрасатнал Промышленностьрал лябуккулул фондран хасъсса форум-семинарданий.

Республикалул БакIчинал аьла-ссалам бунни Дагъусттаннайн бувкIсса Аьрасатнал Машлул ва промышленностьрал палаталул вакилтурахь – Дмитрий Курочкиннухь ва Владимир ХIамзахь.
Яла Владимир Васильевлул бувсунни республикалийн кутIасса чIумул мутталий бувкIун бивкIшиву 30-нния ливчу­сса федерал министерстварттал ва ведомстварттал каялувчитал. Мунал бувсунни республикалийн бувкIун бивкIшиву Аьра­сатнал Шяраваллил хозяйствалул министерствалул делегация ва хъуннасса къулагъас дуван най бушиву вацIлул хозяйствалул, ппиринж бугьаврил, мелиорациялул масъаларттах.

ДР-лул БакIчинал тIимунийн бувну, хIакьину промышленностьрал дузрайн дуккан дуллай дакъар цила каширду. Налогирттал потенциалданул бутIа промышленностьрал бур 35%, му хъинну агьамссар республикалун. Владимир Васильевлул кIицI бунни промышленностьрал захIматми кIанттурду – инвестициярттал луртанну диялсса дакъашиву, кредитру дучIан дуван захIматну бушиву, промышленностьравусса инвестициярттал проектру дузрайн дуккан дуван захIматну душиву ва дуккан дурмур даххан захIмат хъанай душиву. Мигу хIисавравун лавсун, гьашину зий байбивхьунни ДР-лул промышленностьрал лябуккулул фонд.
Хъирив ихтилат бунни Дагъусттаннал Машлул-промышленностьрал палаталул президент Бадруттин МахIаммадовлул.

Яла махъ лавхъунни АьФ-лул Маш­лул-промышленностьрал палаталул вице-президент, Аьрасатнал Промышленностьрал лябуккулул фондрал экспертътурал советрал член Дмитрий Курочкиннул. Мунал тIимунийну, хIакьину ца яла захIматмур масъала хъанахъиссар инвестициярттал луртанну диялсса дакъашиву, ляличIину промышленностьраву. АьФ-лул Машлул-промышленностьрал палаталувун бухлай бур 180 палата Аьра­сатналсайки гьарца хъунмасса шагьрулий. Зий дур щаллусса система, му сис­тема зузи дурну, бюхълай бур циняв промышленностьрал предприятиярттал хьхьичIсса захIматшивуртту духлаган дуван. Дмитрий Курочкиннул мукунма бувсунни промышленностьрал предприятиярттан кумаг баврил мухIлухIинная.

Яла махъ лавхъунни АьФ-лул ТПП-лул Финансирттал ва инвестицияр­ттал политикалул советрал председатель Владимир ХIамзал. Мунал бувсунни хIадурну ушиву цамур чIумал Дагъус­ттаннайн учIан ва буван ми масъаларттал хIакъиравусса семинар. Яла ихтилатру бунни республикалул промышленностьрал предприятиярттал вакилтурал.
БатIаврил хIасиллу дунни ДР-лул БакIчи Владимир Васильевлул.