Дакьаврил ва нахIушиврул суратру

ОьрчIру буруччаврил кьини ла­хъа-хъунну кIицI ларгунни Ма­хIач­къалаливгу. Му кьини республикалул хъун шагьрулий хьунни чIярусса шадлугъру. Миннувасса агьаммигу – Расул ХIамзатовлул цIанийсса проспект­рай.

Бадрижамал Аьлиева
КIюрххила, «Жу дихьлай буру дакьаврил сурат» тIисса цIанилусса Республикалул конкурс-выставкалул лагрулий, шагьрулул оьрчIал искусствалул ва художествалул школардаясса оьрчIру байбивхьуна суратру дихьлай.


Хъирив Оьруснал театрданул хьхьичI­сса майданнив хьунни ДР-лул Культуралул министерствалул, Халкьуннал творчествалул къатлул сакин дурсса «Зунттал оьрчIру» тIисса оьрчIал творчествалул фестиваль.

Муний гьуртту хьунни респуб­ликалул районнаясса ва шагьрурдаясса оьрчIал коллективру. Гьуртту хьуми циняв лайкь хьунни Культуралул министерствалул чулухасса дипломирттан.