Владимир Васильев: «Власть кIура дарунни агьалинайн лажинну»

Дагъусттаннал БакIчи Владимир Васильевлул региондалул СМИ-лухь бувсунни Дагъусттаннал делегация XXIII Петербургуллал дунияллул халкьунналдянивсса Экономикалул форумрай гьуртту шаврил хIасиллал хIакъираву.


Мунал тIимунийну, июньдалул 7-нний къулбасру дурну дур цаппара кьутIирдай (соглашение). Цалчинмур кьутIи дур Дагъусттан ва «Россети Северный Кавказ» тIисса компания республикалий электросетирдал комплексраву лябу­ккулул аралуву хIала-гьурттуну зузаврил хIакъиравусса. Му ххуллий цалчинми шаттирду жува лавсъссар дукIу. Ларгсса кIинттул жучIава 20 процентрал чан хьуссар электросистемарттаву отказру ва аварияртту. Гьашинугу мура даву дуллайнма буссар.

КIилчинмур кьутIи чирчуну дур «Ростех» тIисса Госкорпорациялущал. Муния хъунмасса мюнпат хьун тIий бур Дагъус­ттаннан. Му корпорациялул заказирттайну жучIара заводир­ттай гьарза хьунтIий дур давур­тту, зузи кIанттурду, технологияртту, оборудование. «Инсантуран бувчIин аьркинссар власть кIура дарну душиву агьалинайн лажинну, миннал оьрму ялунгу ххуй-хъин буван хIарачат буллай бур», — увкунни Владимир Васильевлул.

Республикалул каялувчинал барчаллагь увкунни ххютула бувксса республикалул ишбажаранчитурахь: «Мунийну коррупциялул ишру чан хьуссар. Мура даву тихуннайгу дачин дуван аьркинссар. Ттун хIисав хьунни бизнесращал чIявуну зун аьркиншиву. Бизнесраща бюхълай бур жунма кумаг буван, жущава тIурча, кумаг бан хъанай бур бизнесран», – увкунни региондалул каялувчинал.

ДакIнийн бутан, июньдалул 6-8-нний Санкт-Петербурглив хьуссар Петербургуллал дунияллул халкьуннал дянив­сса Экономикалул форум. Да­гъусттаннал делегациялувух бивкIссар ДР-лул ХIукуматрал Председательнал 1-ма хъиривчу ХIажимахIаммад ХIусайнов, республикалул информатизациялул, связьрал ва массовый коммуникациярттал министр Сергей Снегирев, республикалул экономикалул министрнал буржру чIумуйсса бартбигьлагьима ХIажи Султанов ва цаймигу.

Июньдалул 7-нний къулба­с­ру дунни хIала-гьурттуну зузаврил хIакъираву «Почта Р­оссии» ФГУП-ращал ва Карелиянал ХIукуматращал кьутIи чирчунни машлул ва экономикалул, элмулул ва техникалул, социал ва культуралул иширттаву уртакьну зузаврил хIакъираву.
Хьунабакьаврий ххал бивгьунни мукунма «Фармстандарт» ОАО-ращал цачIу Да­гъусттаннай Ядер медициналул центр баврил масъала.
Субъектрал БакIчи Владимир Васильев гьуртту хьунни «Российская экономика в поисках стимулов роста» тIисса панел сессиялий, АьФ-лул ПаччахIлугърал советрал консультатив комиссиялул батIаврий.