Май зурул 25-нний Ттурциятусса фронтовикнан, подполковник Шяпи Аьлиевлун 99 шин хъанай дур

ПатIимат Рамазанова
Ттурциятусса ХIажибуттал арс Шяпи Аьлиев аьрайн увцуну ур Буйнакскаллал бахьттагьалтрал училище къуртал бувну цаппара зурдардивату.
Оьрмулул 21 шинаву ва роталул командирну ивтун ур, ванал каялувшиву дуллалисса роталуву 4 хIаписар ва 100 сержант бивкIун бур. Къуллугъ буллай ивкIун ур Ухссавнил Къапкъазуллал дивизиялуву.

[pullquote]Сталин ва Бериял дачарду ядуллайгу ивкIун ур Шяпи. ­«Оьшиврий цIа ларг­сса ухьурчагу, Берия ихтилат бан хьхьичIунай хъана­хъисса, аьла-ссалам бусса ия…». [/pullquote]

Яла, щаву дирну, Ереваннай, Бакуй хъин хъанай ивкIун ур. КIилчингу ванайн щаву дирну дур Украиннай, му щаву дирну мукьах ва аьрая шавай тIайла увккун ур. Капитаннал чиндалуву увкIун ур цувагу аьрая. Дяъви къуртал хьуну махъ военкоматрайн зун оьвкуну бур, личIи-личIисса давурттай зий ивкIун ур. Подполковникнал чиндалуву кьабивтун бур ванал аьра­личунал къуллугъ. Лакрал райондалий зий ивкIун ур военкомну. Хивуллал райондалий военкомнугу зий ивкIун ур. Шанна шинай Сталиннул ва Бериял дачарду ядуллайгу ивкIун ур.

— Сталиннул дача Абхазиянал дазуй дикIайва, Бериялмур – Гагрилий. Сталиннул дача щаллагу щюллишиврувун дахьларгсса дикIайва, цурда дачагу щюллисса рангирал дия. Итталун къадагьланшиврул, вилаххав душмантурая мугъаят хьуншиврул духьунссия щюлли рангирал. Дача цIакьну ядуллан бикIайва. Сталиннуй я бацIан, я щунгума къабитлан бикIайвав жу, къарал буллалими. Оьшиврий цIа ларгсса унугу, Берия ихтилат бан хьхьичIунай хъанахъисса, аьла-ссалам бусса ия, мунащал паракьатну гъалгъа буван шайва, — тIий ур Шяпи.

Ванал арснал Апаннинал арс Русттам( вагу полициялий зий ур) буслай ур: «Ттаттан хъинну ххирар Сталиннуясса луттирду, генералтурал биографиярду ккалан. Хъун дяъвилул аьралий тарих ххуйну кIулли. Хъинну ххирар пасихI литературалул луттирду ккалангу, амма дяъвилия буслан къаххирар цанма».

Аьлиев Шяпи лайкь хьуну ур «ЯтIул цIукул»,1-мур ва 2-мур даражалул Буттал кIанттул дяъвилул орденнан.
— Дяъви – му тIуркIу бакъар, бусай хаварду бакъар, киносурат ягу театр бакъар, дяъви му – бивкIур, къювур, оьттур, макьри. ХIакьину сагъну зана хьурчагу, гьунттий зана хьував къакIулссар. ТIайлабацIу хьурча, кьацI учинмур дириянтIиссар, къахьурчагу – личIантIиссара ккашилнува. Дяъвилий ххуйсса цичIаргу да­къассар. Ттун, командирнан, яла захIматмур бикIайва саллатIнан нава вас-ццах бакъа ушиву кка­ккан буваву. БивкIулия нигь дакъа къадикIайссар, ивчIан ччиссагу цучIав акъассар. Дяъвирив, рахIму бакъа, вирттаврайн хъапа тIун бикIайссар», — тIий ур Шяпи.
«Дагводканал» управлениялул аппаратрай зузиссаксса хIаллайгу Шяпи лайкь хьуну ур захIматрал бахшиширттан ва хIурматрал грамотардан.

Шяпиная бивзун бур 5 арс ва 3 душ. Вай циняв хIакьину хIурматрай бур цала буттал, му аякьалийн лавсун. Ванал авторитет ужагърайгу, агьлулийгу лахъну дур, ванал му­къул цIакьгу, биялагу личIиссава бур.
Шяпинал наслулийн аьралийтурал династия учирчагу, тIайлану хьунссар. Арснал арс Рустам акъа­ссагу, аьралитал цаймигу бур: арс ГъазимахIаммад зий ивкIун ур Гъумук военкомнал хъиривчуну, яла – ТIиларатIиял райондалий военкомну. ГъазимахIаммадлул арс Нариман зий ур Буйнакскалий аьрали прокуратуралий. Шиккува бусан, Нариманнун хъинну ххуйну кIулли лакку маз, кIулну бур яру мазгу. Ванал аьраличунал пиша язи бугьавриву бутталгу, ттатталгу тарбиялул биялагу бур.

Фронтовик Шяпи яхъана­хъисса къатрал чIирай «Шиву яхъа­най уссар Хъун дяъвилул ветеран Шяпи Аьлиев» тIисса улагу ларчIун дур. Махъсса шиннардий, гьар Ххувшаврил байрандалул кьини, Шяпи Аьлиев барча уван ваначIан учIайсса ур МВД-лул министр Аьвдурашид МахIаммадов. Ванал къулагъасраяту рязину бур Шяпинал ичIувацири.

Май зурул 25-нний дяъвилул цIаравух увксса подполковник Аьли­ев Шяпинан 99 шин хъанай дур.
Нагу буссияв Шяпинахь, цахава арснал оьрчIал Рустамлул буллали­сса хIурматрал ххатирданун, мунал щар дуциннин яхI буван аьркинссар тIий. ЯхI буллай аьдатсса вирттавраяссагу ухьувкун. ЦIуллушиву дулуннав вихьхьун, буттауссу Шяпий!